官義岱 給力 拆拿 微博世代大博弈
1 :
GS(14)@2013-01-30 22:19:27http://www.metrohk.com.hk/index.php?cmd=detail&id=204131&search=1
中共一哥習近平最近去廣東考察，第一間報導呢單新聞嘅媒體唔再係中央電視台，而係微博。同樣，胡錦濤最近返去家鄉泰州，第一間爆料嘅媒體亦都係微博。至於政法委書記王岐山，就更加係日日猛咁「蒲」微博，有啲乜嘢關於貪官嘅微博消息，佢全部立即跟進追查。可以話，依家全世界都進入咗微博世代，好多事都會同微博有關。北京最近開咗個會，下令首都二百幾萬網絡打手唔單止要上各網上論壇，仲一定要開微博，上微博。呢二百幾萬個網絡打手，淨係喺北京咋，全國嘅網絡打手人數，當然更加多。講句唔好聽，佢哋一人吐一啖口水，都真係可以浸得死你。表面上，官方網絡打手上微博，當然係要維穩，發表多啲支持官方嘅意見，做到好好睇睇。實際上，中國官員使咁多錢請呢班「五毛黨」，仲有一個用途，就係要「溝淡」啲反映腐敗，踢爆貪官嘅消息，等中紀委冇咁易追查到。總之，所謂上有政策，下有對策。中國嘅微博世代大博弈，依家已經開始咗喇。
官義岱