| ||||||
華潤前董事長宋林，涉嫌違紀被中央免職受查，坊間即爆出不少小道消息，最震撼當然係佢將灣仔華潤大廈五十樓總部當成中聯辦私竇，豪鋸廿二頭吉品鮑，又飲法國紅酒，一餐最少花費六十萬銀，全由華潤找數。受惠嘅人唔少噃，包括同宋林一向來往甚密嘅中聯辦前任主任彭清華，而現任中聯辦主任張曉明，傳聞都上過華潤五十樓開餐，咪話唔嘆！ 食得好，當然亦要住得好。中聯辦大大話話喺香港有七十幾億物業揸手，大把私竇。其中兩年前落成嘅大潭道二十一號「行宮」就最正喇。CY當年登基兼香港回歸十五週年，就傳當時嘅國家主席胡錦濤下榻於此。小宗老友話，呢座行宮市值十億，如今係中聯辦高級職員宿舍。小宗睇過平面圖，全部一廳一房間隔，個廳已近六百呎，而近三百呎嘅房裡面，仲有間好大嘅浴室，間牆係玻璃的話，真係剝光豬浸住浴，就可以嘆住南區無敵海景呀！不過咪咁風流住，西環前宣傳文體部長郝鐵川今年二月喺毫無先兆下突然離職，加上宋林墮馬，顯示派系鬥爭兼中南海打貪行動已燒到嚟香港，仲有幾耐嘆呀同志？ 職場秘笈「香港仔」精神 港大建築系畢業，由一個小小的項目經理，扶搖直上，升任至富豪國際（78）、百利保（617）及世紀城市（355）的董事。他每期分享不同的職場經驗及秘笈；要上位，無往不利。有讀者來郵分享對八、九十後的睇法，這一篇是在下特意寫給這新一代看的，講述三個香港勤奮青年做事的積極態度及拚搏精神。幾年前，我參與公司一項在香港首次以酒店產業信託形式上市的籌備工作，當中涉及很多不同專業的服務，主要有律師、會計師、投資銀行、獨立財務顧問等等，其中有多個年輕人的做事態度，令我印象深刻。須知道上市的準備工作，非常冗繁及沉重，而為了應付緊迫的死期，所有投入工作的專業人士，大部分每日睡眠不足數小時，為上市細節亦爭拗不已，眾人皆筋疲力盡。其中有一名在香港出生，外國留學畢業的投資銀行經理，未到三十歲，國語及英語都很流利，每一天都做到很「早」（大概凌晨二時），但他仍時常臉掛笑容，還可以很有條理的，和別的團隊討論或爭論上市細節。我從未見過他發脾氣（睡眠不足是很容易發脾氣的），任何時候對上司及其他行業的長輩及平輩都非常有禮貌，他的耐力、個人修養、專業態度令我們各同事都讚賞不已。另一名在香港出生，香港受教育，出身於富貴家庭，即將嫁入豪門的見習靚女律師，除了做事勤奮外，也因她在其所屬團隊中的資歷是最輕，很多瑣碎工作她都要做。律師樓到了晚上，因節省開支，所有雜工都要收工，這時候，靚女律師就變成大長今、賓妹、阿四，每到晚飯及消夜時間，她都主動問各人要吃什麼，再去落order，派飯盒及飲品，收拾殘局一腳踢，而自己永遠是最後一個吃飯盒。以她的背景，其實可以拒絕做這些donkey work，但她永遠都很主動，又是面帶微笑，沒有覺得委屈。最後一位是職位較高的女律師，做事認真、搏命，但奈何身體較弱，常見她面青青又不肯休息（其實是不能休息，因為她是某一範疇的靈魂人物），有一次，她開會中途上洗手間，眾人久候她也未返，入廁所找，赫見她倒在廁所中，原來她因睡眠及血氣不足，暈倒廁所，但休息十多分鐘後，又若無其事繼續工作！本人也是非常捱得，但見到這位女俠也要敬禮。在此衷心希望年輕一代以此三人為榜樣（病倒除外），不要整天怨天怨地、上網、打機，怕辛苦，怕蝕底。除非你是想奪得「鬥快被淘汰比賽」的冠軍！ 本週IPO 呢架賓士車牌，驟眼睇係「IPO」，唔通係新股老闆或專做IPO嘅包銷商自定車牌？其實現時自定車牌號碼係唔可以用英文字母「I」、「O」及「Q」，以免混淆，而呢個號碼唔係全英文嘅IPO，而係「1P0」，頭尾兩個都係數字，認真鬼馬。登記車主公司嘅股東之一，叫羅明珠，與前「開心少女組」女星羅明珠同名同姓，不過只係報住田灣居屋，斷估唔係炒新股發達嘅屋邨隱形富豪啩！ 本週贗品簽名 潮流興老翻，故此出現假新奇士橙，絕對正常。冇假新奇士橙至係反常。不過，超人李基金登嘅廣告，點解都要用個疑似王光亞主任口中嘅贗品簽名呢，則認真考起。超人李自己講過噃：「以誠待人，是我生活上堅守不移的原則。」唔通乜都可以誠實，唯獨簽名就唔得？冇理由嘅。 | ||||||