富事通：派錢大過天？ 李兆富
1 :
GS(14)@2013-01-05 13:36:12http://www.sharpdaily.hk/article/fin/20130104/165881
元旦反思歪遊行，身在太平洋另一邊嘅我，只可以遙距觀察。不過，今時今日，淨係睇朋友「打卡」，透過各人手機鏡頭，大概都見到場面有幾墟冚。最多人廣傳嘅一張，就係長毛一支公對幾百個特區警察。我完全唔明白，點解特區蠢到要用幾百人，去成全人家做革命烈士。冇政府嘅配合，佢只係一個「大聲公」。乜你哋班人見唔到佢心口個公仔？對一個成世都想做烈士嘅人，坐吓監、罰吓款，係角色設計嘅一部份。就從一件小事，就睇得出呢個政府缺乏細緻手段去處理社會矛盾。
師傅教落，分析任何政府嘅行為，一定要從制度最基本嘅行事準則開始。特區政府，尤其是自從「轉左」呢個特首，做乜嘢都恃住手上大把資源。冇錯，思歪對香港最大嘅衝擊，並唔係佢講大話，而係佢引入強國式嘅大堆頭、「大石砸死蟹」嘅手段。
長毛唔聽話？幾百友圍佢，睇佢驚唔驚？有反對聲音？搵雙倍，唔夠就三倍、四倍聲量去同佢嘈過！
市民就要錢？派到佢哋夠為止；要居屋？起！呢種政治手段，叫「紅蘿蔔與棍」（Carrot and Stick），又或者，講得文雅啲叫「賞善罰惡」，源出《韓非子》，算係中式政治嘅深層次基因。
仲有唔夠兩個星期就會發表《施政報告》，以思歪嘅一貫作風，應該都係「講就兇狠」，派人哋嘅錢最易做，佢點解唔做？其實，只不過係非常簡單嘅博弈論原則：當利益唔一致，有權制定決策程序嘅人，最先為自己爭取最大利益。如果，思歪深入了解呢個博弈論原則，就知道點樣用「派餅仔」嘅權力，去建立利益共同體。以前港英以及早兩代政府，都識；思歪？我買重佢連派錢都會派到俾人鬧，大家放長雙眼睇吓啦。