ZKIZ Archives


歐豬識嘆德國會鈔 左丁山

http://hk.apple.nextmedia.com/template/apple_sub/art_main.php?&iss_id=20110926&sec_id=12187389&art_id=15645799&cat_id=255&coln_id=22

股市持續下跌,跌到大家都冇心機。大記者今年年初好夠運,在不同晚會場合連環抽籤中大獎,有高清電視,有新款數碼相機,最夠運一次就係一位新聞官抽中大 獎,因價值超過五百元,按例不能收取,即場退還俾主辦單位,後來再抽過,中獎人竟然就係大記者夫婦,獎品係兩張國泰機票,可選擇前往任何一個目的地。最近 股市大跌,大記者終於清倉,止蝕止賺不一。佢話:「唉吔,冇眼睇,攞國泰機票旅行去也,最初以為去意大利使費好貴,點知道股票賣遲兩日仲貴呀!早知在八月 尾賣晒,可以去歐洲玩多一個月啦!」
都好,還夠錢去 Tuscany遊玩一排,碰啱公關大姐大與黃軒利大狀一班人又係差不多時間去意大利,可能大家在彼邦相逢都唔奇。
意 大利、西班牙、希臘都係旅遊好地方,但三國偏偏負債纍纍,國家難以負擔,意大利總理貝盧斯科尼仲過癮,呢個時候還有心情掛住玩妓女,用公家飛機接八名靚女 與佢過一夜。意大利文化根基深厚,唔知有冇類似「商女不知亡國恨,隔江猶唱後庭花」之類嘅古詩呢?呢位總理好色到夜夜笙歌,令人懷疑佢第日早上可唔可以準 時返工,處理國家大事,換在任何其他國家(或者法國除外),佢已老早被轟下台。
難怪德國人好唔鍾意挽救歐豬國家。上個月與一位德國商人吃意大利 餐,講起此事,佢就大發牢騷,佢話:「你知唔知點解我地德國冇房產泡沫、冇碌爆卡等事情呀,因為至到今日,德國人仍然鍾意在超級市場數銀紙找數,冇錢就唔 買,唔會去碌卡,我地買樓(德國人其實鍾意租樓),好多時都盡量用現金,將樓按成數 㩒到最低。但係聯邦政府就浪費我地納稅人啲錢去支持西班牙人、希臘人及意大利人享受陽光海灘,吃喝玩樂,唔勞氣就假,默克爾夫人下次選舉有可能下台㗎!」 咁講法,勤力省儉嘅德國人直情係寃大頭,默克爾夫人撥款支持挽救希臘之時,會唔會諗起貝盧斯科尼正在攬靚女嬉戲呢?意大利財長話好歡迎中國購買意大利債券 或任何意國資產,中國不如就去買埋 Prada、 Armani、 Ferrari返嚟啦,意大利國債留番俾歐洲央行買入好咯。

PermaLink: https://articles.zkiz.com/?id=28126

Next Page

ZKIZ Archives @ 2019