富事通：對央行有主觀願望
1 :
GS(14)@2012-08-03 11:03:14http://www.sharpdaily.hk/article/fin/20120803/118832
「雖然聯儲局今次冇行動，不過措辭上，比之前更加明確。上次話準備好出手，今次就話將會出手。聲明又話，聯儲局將會密切留意經濟狀況。以前格林斯潘咁講，跟住就有大動作。」聯儲局一連兩日會議，最終得個桔。不過好多投機者，總會選擇見到想見的部份。
坦白講，我都跌眼鏡。本來，我真係以為，今次聯儲局會將銀行額外儲備息率，由0.25%減到零；又或者，至少減到0.1%至0.15%。一來，銀行額外儲備息率會影響流動性。二來，當短息平過額外儲備息率，即係聯儲局「暗啞底」對銀行補貼。三來，近期銀行業同政府關係越來越惡劣；呢場戲要做落去，就要做全套。點知，聯儲局連呢一招都唔出。
至於冇將超低息延長到2014年之後，我反而唔覺得太出奇。聯儲局之前會議紀錄，內部老早有反對聲音。再講，得個講字，有等於無。冇乜實用但又有壓力，不如唔好做，係唔係？
文章出街時，歐洲央行做乜都已成為歷史。依書直說，兩大國貨幣，一隻貶值，對另一隻即構成資金流失壓力。自70年代美元貶值，令世界各國都要跟章。但掉番轉頭，歐央行會唔會令聯儲局做嘢呢？由o依家到九月聯儲局開會，大家都會沉醉主觀願望當中。
李兆富