胡孟青：禍不單行的「個別事件」
1 :
GS(14)@2012-04-03 21:08:13http://www.sharpdaily.hk/article/index/15307/20120320/68884/
市況未轉壞，明顯係僅僅靠一個期望概念Expectation去維繫。雖說誰做特首都不會好得去哪裏，市場最擔心係難以計算的不明朗因素，部份持貨者因有懷疑選擇咗現金係好合邏輯，自由市場的好處是有選擇。走為上着者較入市撈貨者力量大，市況自然被扯下去。
擔心市場由最初炒估值到炒作業績，期望甚麼？谷底反彈，衰無可衰，即係炒Turnaround，內地術語：利空盡頭是利好。一切好像就是如此簡單。很多公司仍相對誠懇，但害群之馬總會有，難得有股評人仍幫隻蛙講好話，將之歸類為「個別事件」，望住呢隻蛙，更加想起從前的一朵花，指的是那些年歐亞農業的那棵蘭花。難道一隻二隻揀來香港掛牌，就擺明係蝦我等香港投資者夠鈍胎、既不懂國情又係產業盲？
然則，一隻上市後已極速被市場遺忘、上市卻只得九個月即發盈警的正業國際（3363），難道又是「個別事件」？更差的是上市後三個月就發盈警的揼揼鬆（豪特保健，6880），掛牌時大吹大擂大合唱造勢、奔走相告行家客戶此股冇得輸，又應否逐隻捉出來打三十大板？有統計指去年上市新股當中，首份業績已出現倒退達兩成之多，難道又是「個別事件」嗎？倒不如掛上一個更堂皇的藉口，話係a series of misfortune吧！上市後業績極速走樣，年半就賬目不清，保薦人及其他中介人、局內人，在多宗堆砌浮沙期望效應例子上都不能卸責。
究竟是盈利見頂才上市？抑或招股書數字已充滿水份？看上市公司舉手投足不難洞悉。上市不足兩年業績一份不如一份、友川（1323）大股東索性以市價打個六折變相賣盤，然而市價已經係招股價的四折，停牌等公佈前短短七個交易日反彈近五成，春江鴨賺到笑，IPO揸貨之小股東就輸到瓜。再次證明，印股票係賺硬，炒股票就隨時輸瓜。見頂上市的好處，是估值攞到盡，加送一隻殼，皆因殼價不菲，早前報價3億的主板殼，現叫價去到5億，且有價有市，又多得內地同胞，市場有好多殼股專家，個個都想靠中間一買一賣過水濕腳賺一筆。買方甚至唔稀罕兼回贈原有上市業務給你，作為大股東，雖然係back to square one回到原點，但一來一回，上市賺一筆，賣殼又賺多筆，自然令一眾股仔流口水，按圖索驥捉路吧！
胡孟青
獨立股評人