豪言大志：還原上海仔飯局
1 :
GS(14)@2012-03-12 22:38:44http://www.sharpdaily.hk/article/index/38065/20120312/65238
其實「上海仔飯局」單嘢是咁樣的。版本一：「天仙局霸王餐」！
嗱！Dream Bear講到明餐飯大家夾錢，每人一嚿，合共五嚿，仲話畀咗飯宴上嘅人，但無講係邊個。而鄉事梁就講到明，自己餐飯無畀到錢！咁請問，嗰五嚿水去咗邊？一就鄉事梁借花敬佛，用咗Dream Bear嗰五嚿埋單，自己一毫子都唔使畀，等於梁營請。咁就違反競選條例啦。
一係就鄉事梁連五嚿水都吞埋，拍拍屁股走人，符合佢話「鄉事派無畀過錢」嘅講法。咁即係成餐飯都無人找過數，等於食霸王餐！呢單嘢，警方點可以唔介入？為小桃源嘅老細討回公道呢？
版本二：餐飯原來係上海仔請嘅。據推理當梁營超級核突每人夾一嚿水，而鄉事梁就大大聲話「我哋唔會畀錢㗎」時，小桃源嘅侍應攞住張單唔知點算，上海仔就喺呢個時候江湖救急，所謂飯局尾聲出現就係出嚟找數！咁就對晒口供啦。
版本三：梁營話上海仔係鄉事嘅朋友，鄉事就話係梁營嘅Friend，梁振英就話唔識佢，咁即係點呢？呢個情況似唔似一場喜宴上面，有賓客到訪，男家以為係女家，女家以為係男家，最後先知原來兩面都唔識！咁就明晒啦！原來上海仔係摸錯門口食錯飯，難怪佢哋話上海仔成餐飯無乜出過聲，因為佢自己都發覺：大鑊！嚟錯咗㖭！乜唔係唐唐搞飯局咩？
既來之則安之，硬着頭皮食埋佢啦。事情就係咁樣啦。你唔信？反正我覺得比佢哋講嘅，可信好多囉！
電郵：
[email protected]
曾志豪