ZKIZ Archives


百億郭太認慳家熊黛林:辛苦錢唔會浪費

1 : GS(14)@2016-11-20 23:52:06

■百億新抱熊黛林想盡快生仔,已在努力中。



熊黛林(Lynn)上月27日低調嫁家族坐擁百億資產的郭可頌,之後二人各有各忙,但她不時在微博放閃晒恩愛,昨日新婚人妻Lynn應邀出席Giorgio Armani Beauty新聞發佈會,同場還有樂基兒、蔡卓妍及衛詩雅等。
Lynn現身即被叫「郭太」,她笑說:「之前唔適應,以為叫我奶奶。」百億新抱好勤力,問為何不做少奶奶?她說:「唔會,一路會做嘢,未有小朋友前會做嘢,搏命搵錢。要珍惜機會,以後有小朋友就可以少啲,而家享受工作。」


「最緊要快生仔」

早前Lynn被拍到日本城等平民家品店買物品被指慳家,她說:「日用品冇需要買名牌,最緊要好用,我哋大家辛苦搵錢,冇需要浪費。」Lynn婚後曾揚言不設防造人,她笑說:「暫時未有好消息,努力中,希望可以快啲。」她直認開始調理身體,身邊好多朋友都提供生B秘方,她說:「自己會注意,例如唔好食咁多海鮮、凍嘢,我都好聽話。」問想生仔或生女?她表示:「呢個唔緊要,最緊要快,仔女冇所謂,老公身體不嬲好,我自己做呢行食冇定時,身體差啲。」Lynn又表示會學廚,她笑說:「因為管男人最緊要管住佢嘅胃,雖然佢而家已經好黐家。」



■早前熊黛林被影到慳家到日本城買日用品。資料圖片

■阿Sa想買樓,可惜政府辣招令她卻步。

■樂基兒在網上學煮中餐,並已買定新年禮物冧男友。

■蔡穎恩(中)等女模出席Giorgio Armani Beauty的發佈會。

學中餐氹男友

樂基兒下月21日返美國過新年,並已準備禮物,她說:「買化妝品畀妹妹,媽媽就買首飾,而男友就買件衫,佢鍾意運動。」最近她在網上學煮中餐,獲男友大讚。另外,蔡卓妍(阿Sa)下星期到澳門做巡迴演唱會,之後到美加,被指賺了不少,問有否買樓投資?阿Sa說:「呢排冇,有辣招嘛,我唔係炒,攞啲唔等使嘅錢投資買吓嘢,好難賺到錢,睇吓畫,自己鍾意嗰幅成幢樓咁貴,而家咁樣打擊樓市,希望可以畀啲優惠本地人。」採訪:羅慧敏攝影:仇志德




來源: http://hk.apple.nextmedia.com/entertainment/art/20161119/19838451
PermaLink: https://articles.zkiz.com/?id=316273

Next Page

ZKIZ Archives @ 2019