胡孟青：爆笑擦鞋騷 笑柄何其多
1 :
GS(14)@2012-03-08 22:45:26http://www.sharpdaily.hk/article/index/15307/20120308/64148
早前有分析員在港交所（388）業績發佈會上擦行政總裁李小加的鞋，被小加木口木面一句反噬噴到一面屁，擦鞋擦着木屐，相信該位入世未深的分析員，肯定會想即時學唐唐鑽地洞。
查實港交所業績明顯受去年市況差、成交弱、利息低影響，加上資本開支大增，全年雖賺50.93億元，增長卻只有1%咁大把，算是持平，最慘係派息減10%，正是艱苦經營，分析員還擦晒鞋讚小加管得好，小加即時一句「恭喜我乜嘢？持平咩？」姑勿論這位分析員是真的拍馬屁還是特登講反話寸爆李小加，都係極度失敗之作，不僅淪為笑柄，更成就多一份反面教材。有見及此，分析員、股評人、財經記者均應引以為鑑。
貽笑大方 無謂獻醜
口甜舌滑，真人面前說假話，自以為襟撈識時務，卻未有顧及行家旁觀者看在眼中聽在耳裏，感覺是何等肉麻兼難受，是非常自私行為。
但知否擺明事前未做功課、卻為發問而發問Stupid Question，也會影衰之嫌，擔心對方以為同行都係如此滑頭。禮貌客氣與滑頭擦鞋，只係一線之差，掌握得不好，係唔係都稱兄道弟一番，只會貽笑大方，知否哥前哥後也有三分險，最慘就係身邊以為是老死的朋友，見你擦得忘形，更不便聲張提醒你，費事撥冷水得罪朋友；至於不喜歡你的人，更加會由得你出醜，然後在茶餘飯後盡情拿出來當笑話。
當然，地球上亦不乏喜歡聽三寸不爛之舌、花言巧語之高管，唔該高抬貴手，拎住鞋箱私人服務就算了，不要在行家面前表演馬騮戲。
話說港版選戰風雲已成為近期各階層茶餘飯後熱門話題，出席飯局前除刨上市公司資料，亦應熟讀港聞版，勤力過追電視劇劇情。既然特首戰已為城中熱話，本來股評人坐埋一枱談天說地講政治，亦沒有甚麼稀奇，也可反映財經人對時事的一份關心；奇就奇在，側聞近期在一個小女子未獲邀出席的大型飯局之上，發生一樁超勁爆笑事件，有股評人學人講政治，但又衰在知啲唔知啲，結果笑到同枱噴飯，假如自己也在場，真係擔心隨時會笑到賴尿，出席飯局前，還要記得帶定盧婉茵近期賣廣告嗰隻成人尿片。
篇幅所限，明天再爆！
胡孟青
獨立股評人