爽人物：豬肉佬鬧爆超市 「充闊佬 仲要扮慈善家」
1 :
GS(14)@2012-01-10 22:22:23http://m.sharpdaily.hk/detail.ph ... 4104&category=daily
許偉堅，豬肉買手，香港豬肉零售業聯席會議召集人，抗議超市七折賣豬肉頂爛市。2002年，他發動過全港逾千街市豬肉枱罷市。他曾在超市投得豬肉檔，但經營一年，拆檔離場。
「大超市七折賣豬肉，話少賺二千萬，回饋消費者，我聽到，即刻火都嚟埋。有超市豬肉檔行家同我反映，平咗嗰啲，自己補貼出嚟。超市闊佬人哋，仲要扮慈善家，班行家敢怒不敢言，呢個究竟係咩嘢世界？如果超市入面，四千種貨品都七折，我可能仲會信你係回饋消費者！
最終市民受害
我咁嬲，因為我都曾經寄超市籬下。我十三歲小學畢業，就跟師父學做豬肉買手，今年六十五，做咗街市肉枱五十二年。一嚿豬肉，養活咗我一家大細。2000年，我學人投咗幾間超市豬肉枱嚟做，諗住樹大好遮蔭，點知超市原來食水好深，一萬蚊生意，超市分二千五，仲未計宣傳費、清潔費，定時定候嘅折扣優惠，全部要自己貼。咁都唔止，超市話啲客用八達通，數期至少四十日以上，我哋啲小本生意，根本無咁多現金周轉。
勉強捱咗一年，寧願蝕入場費，都決定離場，做番街市好過。講真，大超市闊佬人哋頂爛市，已經唔係第一次，2002年超市減價戰，我哋啲街市豬肉枱夾喺中間，冇人幫襯，都罷咗市一日。2012年，兩大超市又嚟夾擊，我哋迫不得已，先出嚟再嘈。
啲客人以為超市平賣豬肉好着數，我想話，到最後，如果只剩兩大超市壟斷市場，佢想賣幾多錢都得，到時受害嘅，一定唔單止我哋班肉商！」