青笑怒罵：《奪命金》裏的原則與本金
1 :
GS(14)@2011-10-24 22:26:42http://m.sharpdaily.hk/detail.ph ... 5307&category=daily
話說大市成交淡靜，有小經紀索性到戲院消磨時間，反正有新戲上映，題材又貼近市場，睇完更感同身受。1980年古裝片《碧水寒山奪命金》就係電影《奪命金》名字的由來。
無獨有偶，故事重心均由失金而起，反而許多睇咗仲未㗳真電影所要帶出令人反思訊息嘅觀眾，未必太在意帶出全片精髓嘅係英文戲名《Life Without Principle》，杜Sir想大家知道，Principle呢個字係全套戲嘅重心，且語帶雙關，一面代表做人的「原則」，另一面代表投資的「本金」，低息環境導致幾多正經存戶被懲罰，無路可逃被動入市投資，金融危機又令幾多本來以為自己在投資嘅人失去畢生積蓄與本金。
戲中飾演孤寒放數佬嘅盧海鵬，生前數口精兼一毛不拔，踢爆銀行所謂理財背後嘅盤算。何韻詩向蘇杏璇兜售基金一幕，足足佔去七分鐘，看似冗長，學杜Sir話齋，整個銷售過程其實應該足足兩個鐘頭，可想而知可以有幾悶，懷疑佢係咪都有過親身經歷。
好多人以為黃日華角色執紙皮無咩意思，但反映原來用勞力賺辛苦錢，一切來得更實在。姜皓文角色則演活何謂人為財死。片尾劉青雲揸住袋錢傻更更、誤打誤撞沽變揸，竟企啱邊反敗為勝食雪茄，唔知係咪代表黑社會也瘋狂之餘，另一幕係勤勤力力何韻詩攞走袋錢劈炮唔撈食雪糕，唔知銀行前線銷售人員睇完，會唔會感慨？行外人電影觀眾反而可能會為變相劫富濟貧的結局而歡呼。
能一睹大師級導演嘅電影，個人固然興奮不已，大學師弟師妹們難得一見杜Sir，其實不應浪費時間講太多客套語，恭維的說話杜Sir應該不會聽得少吧！電影海報顏色的設計，也有點不着邊際或搔不着癢處，討論角色所代表的人性與現象，就已經是在討論這部電影。
只要有留意近期杜Sir接受訪問時對金融危機、股市投機與施政報告的看法，對佢過去執導嘅電影都比較注重大城市小人物題材，今次更進一步食正高樓價、全民皆股、銀行前線被捽數、超低息環境下存戶被動投資變投機等話題之作，不難想像佢應該係借呢部不太過份商業化的電影，喚醒大家的社會觸角。只怪自己一談投資又忍不住滔滔不絕講得太多，自覺有點喧賓奪主，也想問問杜Sir進行資料搜集及篩選題材相關問題。
真正深入關心社會的人，會從這部電影中得到一些啟發，這部導演眼中的習作前後拍了三年，但一點都唔Out，何解？金融市場的問題由此至終未有從根本解決也。作為一部寫實電影，從電影所要帶出的人性出發，今時今日，連黑社會都不務正業，瞓身入市炒賣，如此極端現象，唔可以話係控訴，更大程度係一種對香港怪現象嘅譏諷，教人反思港人已習慣炒樓炒股搵快錢，已經無可能返轉頭，多悲哀！
胡孟青
獨立股評人