林奮強創立一個非牟利組織，名為 HKGolden50，就香港經濟社會問題作深入研究，並會公開發展研究報告，供公眾討論、辯論。林奮強呢檔嘢旨在為香港做實事，只有支出，並無收入，自 己又不收人工，以金錢而論，林兄哥不止損失巨額基金經理年薪及花紅，並且要自掏腰包支付一切使費，佢嘅損失相當大，不過佢既然一心回饋社會，本耶穌會精神 為香港社會服務，好值得尊重。
強哥自香港華仁畢業後，到英國曼徹斯特大學攻讀經濟與金融，考埋英國 Chartered Accountant（ C.A.）先至回港，既在曼城讀書，你話佢捧邊一隊呢？唔駛多講啦，曼聯贏波佢就最高興，佢近月忙於演講「黃金五年」，寫報告，對友邦保險、國衞保險、港 大 SPACE、港大畢業同學會、摩根史丹利、瑞銀、中大 EMBA演講，聽日又到中大新亞校友會，前後加埋有近二千人聽過，反應相當熱烈。喺咁忙嘅時間，左丁山問佢有冇睇到曼聯大勝阿仙奴八比二？佢笑到合不攏 嘴：「冇睇直播呀，不過有線新聞重播又重播入球過程，越睇越爽，乜嘢疲勞都忘記晒。」曼徹斯特還有一隊曼城噃，又係表現搶眼都極，今屆英超冠軍，睇嚟一定 留在曼徹斯特市！
見完林奮強，碰到獅子山學會行政總監王弼，佢真係唔識時務，着住件黃色球衣，就係阿仙奴以前嘅作客球衣，寫住阿仙奴── 1896年創立。左丁山笑佢：「係呀，自 1896年以來最大最羞辱嘅一場敗仗！」王弼連忙解釋：「今朝着錯 T恤啫，我唔係阿仙奴擁躉！」咦，唔好輸咗波就話唔係噃！
阿仙奴以培養新兵著稱，但今季曼聯嘅新兵搶盡風頭，費格遜威到盡，雲格失色，其中有乜原 因？左丁山就認為雲格與阿仙奴弊在唔信任老將，往往將當打球員在 27歲、 28歲時候就以高價賣走，驚死佢地在 30歲後就身價下跌，於是乎，成隊球員冇乜邊個最有經驗及臨危不亂嘅領軍精神。費 Sir就唔同，重視新人之餘，還肯留下啲老人家如傑斯、史高斯、里維利、費迪南、雲迪沙等，常以舊帶新，讓新人從舊人經驗學習，不致踢到慌失失冇信心，新 人固然好，但如無老嘢帶領住，好易成為盲頭烏蠅，一事無成，阿仙奴就係最佳例子。