📖 ZKIZ Archives

[貼圖]吳傑莊

1 : GS(14)@2011-04-10 22:11:39

---

2 : GS(14)@2011-04-10 22:11:52

當 70後嗌捱得辛苦、 80後嗌無機會，咁香港嘅年輕人，到底仲有無明天呢？「係香港社會氣氛有問題，令佢哋覺得香港只有兩三個行業！」年僅 36歲嘅吳傑莊，喺 2000年獲選「香港十大數碼傑出青年」，靠 IT搵到第一桶金，要留意，係無家底、無靠山、肯蝕底、識爭取、夠毅力，完全獅子山下最典型嗰隻奮鬥故事，「最幫到自己嘅就係自己！」
公屋長大嘅吳傑莊，係專研人面識別技術嘅鈦極科技嘅創辦人，公司喺美國上市，「我對自己有要求，大學嗰陣，大家同學傾偈，我自己呢，就想有間上市公司！」無夢想嘅人，同一條鹹魚無分別，後生仔，諗頭真係不妨大一啲。

「創業最緊要堅持　肯蝕底」
成功，當然唔係必然，尤其你唔係阿邊個富豪個仔。吳傑莊當年係搞生物識別嘅， 2003年嗰陣，佢開發嘅 FaceOK，喺美國最大嘅 IT展覽 COMDEX贏咗 Best Of Comdex，當年膽粗粗去參展，都係自己慳住使，一手包辦咁起程。後尾，公司上埋市再賣埋，家佢最鍾意互聯網，而淘至尊，就係一個科技含量極高嘅網上商店，而且仲應用咗大量面相識別技術。
「其實創業最緊要堅持，肯蝕底，剛剛出嚟創業，你會遇到好多唔知係咪機會嘅機會，每次你都驚俾人搵笨嘅話，咁你會錯失好多機會。」佢又補充，「與人共事先學吃虧，做落去你保持到自己信用，人哋係會賞識你嘅。」但時下大部份年輕人似乎無呢種心態，「呢一代嘅後生仔可能比我哋聰明得多，可能計算得比較準確，計有無利潤，但咁就短視同影響佢哋長遠發展。」
所以，佢極之反對香港無機會呢個講法，「後生仔覺得無希望，係因為只睇到金融地產呢啲已經俾人開發晒、飽和晒嘅行業，其實互聯網嘅世界有大把機會，係地產同金融嘅前輩唔識做嘅，而互聯網產生嘅生意，機會更加係無遠弗屆……」
吳傑莊拍到黃英豪有人話好彩，查實兩人十幾年前喺天津考察度認識，就算惺惺相惜，都先經過一段長時間嘅觀察至合作，與其話吳傑莊好彩，不如話兩人都識得把握機會，搵個幫到自己手嘅人做 partner。咁吳傑莊又係咪順風順水？
「嗰陣集咗資返來公司就要請人，自己又未打過工，把握唔到打工心態，搞到好多人要走，咪即刻補鑊學點管理囉……」所以，成功同失敗，其實同你係幾多十後無關嘅！

吳傑莊小檔案
36歲，已婚
• 1996年　理工大學製造工程系一級榮譽畢業
• 1998年　創業，開發指模識別技術
• 2000年　獲選香港十大數碼傑出青年
• 2001年　開設鈦極科技，從事面相識別技術研發
• 2006年　公司在 Nasdaq上市

公職：
•全國青聯常委
•菁英會司庫
•香港理工大學客座教授
•香港創新科技協會會長
•香港青年生動力主席

---

3 : GS(14)@2011-04-10 22:12:05

力撐菁英會　非富二代俱樂部
2011年04月04日

認識吳傑莊，好多人係由一堆組織開始─全國青聯常委、菁英會、香港青年學生動力等，或者因為組織內某啲富二代成員形象太過深入民心，所以普羅大眾唔覺上述組織「做到嘢」。「我哋其實做咗好多嘢 o架！」吳傑莊咁講。
「好似菁英會咁， 2008年已經搞大型招聘會，到家都年年做，今年係 3月 19日搞，有 1000份工畀啲後生仔見工。」由於彤叔長孫鄭志剛有 sponsor，所以呢個活動家冠名叫「共創新世界」，每年喺上海、北京搵啲工作畀年輕人。
唔止咁，菁英會仲年年主辦博鰲青年論壇，另外，會內分咗 10個研究社，向中央政策研究組同政府畀意見，「我自己係 IT嗰組。另外，嚟緊 8月會組織一個 8000人嘅學生團，去參加深圳世界學生運動會，等佢哋了解吓外面嘅世界。」睇嚟，唔係一個富二代俱樂部咁簡單喎。

---

4 : GS(14)@2011-04-10 22:12:20

力撐菁英會　非富二代俱樂部
2011年04月04日

認識吳傑莊，好多人係由一堆組織開始─全國青聯常委、菁英會、香港青年學生動力等，或者因為組織內某啲富二代成員形象太過深入民心，所以普羅大眾唔覺上述組織「做到嘢」。「我哋其實做咗好多嘢 o架！」吳傑莊咁講。
「好似菁英會咁， 2008年已經搞大型招聘會，到家都年年做，今年係 3月 19日搞，有 1000份工畀啲後生仔見工。」由於彤叔長孫鄭志剛有 sponsor，所以呢個活動家冠名叫「共創新世界」，每年喺上海、北京搵啲工作畀年輕人。
唔止咁，菁英會仲年年主辦博鰲青年論壇，另外，會內分咗 10個研究社，向中央政策研究組同政府畀意見，「我自己係 IT嗰組。另外，嚟緊 8月會組織一個 8000人嘅學生團，去參加深圳世界學生運動會，等佢哋了解吓外面嘅世界。」睇嚟，唔係一個富二代俱樂部咁簡單喎。

---