業績簡評 - 聯亞集團 (0458.HK) PARTIPRAL 派得好
http://partipral-hk.blogspot.com/2011/08/0458hk.html
聯亞剛公佈半年業績, 營業額同比只微升11%但毛利卻大升27%, 主因係去年同期製衣分部佔整體收入比重較高, 轉型後以零售作主力, 令今期毛利率大幅提升. 銷售開支, 行政開支加埋都係3億, 而去年同期係2.85億, 對比毛利增長來講兩者上升幅度相對上溫和得多, 證明聯亞控制成本能力仍然相當強.
純利率大升, 因為零售業務比以往更吃重. 環比表面有所不及, 但要留意2010年下半年純利包括兩千幾萬賣廠收入, 若將兩時期之特殊收益撇除, 10年下半年純利率約為6.5%, 而今期就係6.2%, 雖然微跌但仍算表現不錯.
雖然聯亞製衣分部一般下半年生意較多, 但今期此分部收入同比只微增仍令人有多少失望. 由於主力市場響英美, 似乎下半年不應過份寄望; 零售業務乃亮點所在, 收入, 盈利同比皆增加近5成, 由於JACK WOLFSKIN主打冬天衫, 所以就算環比有倒退都不應過份擔心. 中港澳銷售點半年再增115個, 對比上3個半年平均每期增70個黎講, 開店速度明顯再加快. 目前設有527個零售點, 而將來亦會繼續擴大零售網絡, 前景似乎仍值得期待.
應收賬, 存貨皆上升, 上半年現金流應該頗為緊拙, 所以短債增加方便週轉. 聯亞經營一向會運用適度槓桿, 個人認為沒太大問題.
估值方面, 半年核心盈利9千萬即每股賺$0.33, 半年派息率維持40%每股派$0.15. 現價$4.80預測P/E 7.3倍, 而一般來講下半年派息不會少於上半年, 息率應在6.3%之上, 估值仍然不貴.
個人來講呢份業績絕對收貨有餘, 本身亂估零售分部半年賺3千2百萬, 最後賺近3千8百萬, 而盈利增長同時亦繼續維持穩定派息率, 之所以點解我選股時對本地薑較為情有獨鍾.
由於今期業績公佈前早有盈喜打底, 市場可能早已預期聯亞有進步表現, 所以反應上可能會稍稍平淡. 而個人則認為聯亞仍然係一家頗有前途既公司, 不論明日升跌, 當然會繼續牢揸不放.