ZKIZ Archives


財經老師好搵過補習天王

1 : GS(14)@2010-11-07 18:00:12

2010-10-27 EW

做財經好搵大家都冇乜異議,但即使周邊行業,都可以有唔少利益,好似財經名嘴,近年就好吃香。由於佢哋有知名度又有傳媒地盤,啲上市公司老細又想班大哥大姐美言幾句,於是頻頻邀約見面,大魚大肉不在話下,周不時仲奉上股票貼士;加上名嘴本身份人工,又寫吓專欄出吓鏡,收入都幾和味。

之但係既要講股又要返工,邊有咁多時間?特別咁多上市公司,稍有名氣嘅財經名嘴簡直應接不暇,於是乎有啲公司要見名嘴,就要好似啲富豪約女明星出席飯局,咁即係點?直接講咪畀錢囉!

老細要請食飯,需付費先請得郁某啲名嘴,聽聞話市場有啲星級名嘴收費隨時要三到五萬銀。嘩,你話幾巴閉,食頓飯要幾萬銀,唔知遲吓會唔會好似股神飯局,要放喺網上畀人競投?

財經老師好搵過補習天王

財經世界千奇百怪,過去大家以為開補習社好搵,補習天王隨時年薪幾百萬,羨煞旁人。但一言知道,?家有個新興行業,收入絕對媲美補習天王,每個課程收費吓吓兩三萬,整個課程約莫十堂,每班講緊六七十人,一班收入已過百萬。呢行係乜?咪就係辦投資補習班嘅財經老師。

呢啲財經老師部分係財經名嘴,有啲係做證券或者期貨經紀,佢哋慣常手法係喺報紙雜誌大賣廣告,話有免費財經講座,名額十分有限,有興趣者要預先留位。到講座時,講解投資知識或心得的時間唔多,但就不斷宣揚自己威水史,講到自己幾掂幾有料,總之就希望將你洗腦。

然後就會向出席者推介課程,例如乜嘢期指或期權投資、乜嘢技術分析,甚至乎必贏秘技等等,總之收費個個都萬萬聲。

財經老師好識捉心理,會跟學生講,唔係有錢就可以參加,佢會畀份試題啲與會者,要達到某個分數先會接受,無他嘅,等你覺得唔係人人可以參加,咁先矜貴嘛。同時,佢又會話,若果即場報名,費用會較原價平三到四成,目的不外乎要逼你早決定,情況有點似發展商賣樓,唔畀時間你想清楚。

佢最精明處,就係即場報名嘅收費金額,通常跟政府持續進修基金個上限金額相近,而佢哋啲投資課程又已經攞到政府認可,咁樣啲報讀人士就幾乎等同免費報讀。既然所費無幾,財經老師又講到個課程幾咁有用,試吓都無妨。

最貴課程每小時過萬元

唔好以為定價貴就冇乜人讀,偏偏相反,原來班財經老師經過分析,發覺人好奇怪,收得平啲人會認為冇料到,反之收得貴先覺得好嘢,簡單講係貴先有市場。行內有位老師,誇張到開一堂收兩至三萬,成堂只有兩個鐘,即係話每小時收費過萬。

不過,上完呢堂後,佢未來一年每日會畀個貼士啲學生,透過呢啲貼士炒期指,成功率極高。至於貼士係乜,最終又準唔準,一言未試過唔敢妄下判斷。呢位老師仲話,佢教過唔少高官,一個課程動輒數十萬,一言都奇怪,究竟邊個高官咁捨得肯用咁多錢讀呢啲課程?
2 : 亞力士(1473)@2010-11-07 22:28:10

而家打開d免費報日日都有幾個,有冇讀過可以分享下?
3 : abbychau(1)@2010-11-07 22:39:09

之前RF 都有幾個呢d 廣告
4 : 龍生(798)@2010-11-07 23:46:48

有冇勇者去闖佢一闖?
番黎再寫番篇文, 講下發生乜事?
寫手arthur 好似有類似經驗, 請現身說法
PermaLink: https://articles.zkiz.com/?id=271468

Next Page

ZKIZ Archives @ 2019