ZKIZ Archives


慳電方法 左丁山

http://hk.apple.nextmedia.com/template/apple_sub/art_main.php?&iss_id=20110820&sec_id=12187389&art_id=15539293&cat_id=255&coln_id=22

家裏客廳吊燈嘅燈泡壞咗三個,門口照明吊燈燈泡亦壞咗三個,因為種種事情,拖咗成個月都未換燈泡。呢日報紙新聞報導,特區政府機電工程署和環境局發表諮詢文件,就限制銷售鎢絲燈泡諮詢公眾三個月,建議分階段限售鎢絲燈泡,首階段集中於所有廿五瓦以上。
屋 企燈泡係慳電膽吖還是鎢絲呢?左丁山矇查查,搞唔清楚,睇怕為長遠計,都費事換燈泡咯,不如一次過大改造,用晒 LED慳電膽好過,但聽講要一筆錢喎,抵唔抵呢?換唔換得過呢?價錢未知之前,唔識計數,報紙話一啲零售商講,現時市場賣貨,鎢絲燈膽與慳電膽各佔一半, LED價錢高,客源甚少。
投資 LED電燈,回報並不難計,如果可以兩三年回本(即以節省到嘅電費除以 LED燈膽安裝費),應該好多人願意,唔駛講甚麼環保社會責任,總之條數計得掂,大家就好快盡責任,條數計唔掂,任你講乜道德,都難以推動,人性就是如此,唔好唱甚麼高調。
呢 日與一位有關人士講及持續發展委員會發表諮詢文件,提出採用不同節省用電方案,徵求市民意見,佢問左丁山有何意見?左丁山笑曰:「駛乜講咁多,電燈公司加 電費,就一定盡方法慳電,譬如可唔可以咁,從數據搵出港九家庭用電平均度數、中位數,凡用電在中位數以下者,以現行電費徵收,即係唔加電費,在中位數以上 者,每超過中位用電量 10%,電費就加 5%,超越 100%者,電費加 50%,如此一來,全港必定人人慳電。」
有關人士立即鬧左丁山不懂政 治現實,(一)咁嘅方法會俾人鬧明益電燈公司,搞官商勾結;(二)大用戶如港鐵、機場、酒店或酒樓一定嘈到坼天。左丁山呢個方法只係粗略建議啫,大用戶可 以商量,俾番 volume discount嘅啫,就因為電費貴,先至會逼到佢地加速轉型改用太陽能與節省能源方法!係唔係明益電燈公司呢?未必噃,當貴電費逼降用電量,電燈公司嘅 總收益唔一定大增嘅,總之大家理性討論研究,唔好亂吠一通先。


PermaLink: https://articles.zkiz.com/?id=27077

Next Page

ZKIZ Archives @ 2019