📖 ZKIZ Archives

李小加口才好 左丁山

http://hk.apple.nextmedia.com/template/apple_sub/art_main.php?&iss_id=20110816&sec_id=12187389&art_id=15526654&cat_id=255&coln_id=22

港交所網站「披露易」俾黑客入侵，不能運作，導致七家上市公司及四百幾隻窩輪、牛熊證停牌，其中包括三隻大藍籌滙控、國泰與港交所自己，停牌時股市正在上 升；停牌之夜，美國股市大跌，杜瓊斯指數跌 519點，次日早上（八月十一日）復牌，投資投機人士，無論機構抑或散戶，除非係淡友，無不蒙受無辜損失。
公 司停牌半日，啱唔啱？中環普遍指責港交所不能隨機應變，只識睇例書，死板到極，目的旨在保護自己唔俾一啲無聊人士（即更加死板之人士）控告。港交所總裁李 小加口口聲聲話基於「公平原則」，維持保護散戶傳統，繼續交易（不停牌）係對散戶不公平喎，故此下咗一個痛苦決定，兩害相權取其輕！
今時今日，呢 啲理由站不住腳。保護散戶當然重要，保證所有交易人士同時得悉公司發放嘅資料，當然係公平，但係公司嘅重要股價敏感資料，在「披露易」當機之後，點解唔可 以通過其他渠道發放？今日有邊個散戶唔上網站、用電腦取得最新資料？只要港交所知道當機之後立即向所有電台、電視台、本港最通用嘅十個八個財經網站、報紙 即時新聞網站、彭博、路透社、杜瓊斯等等發出通知，發放七公司最新資料並指示投資者上嗰七間公司網站瀏覽最新資料，相信全港在下午一點半復市前已經知道 晒，七家公司唔駛停牌，有邊位夠膽厚面皮到話自己乜都唔知，港交所對佢不公平，告上法庭去呀？
事隔一日，李小加先至話港交所有補救措施，以後有事 就用本文前一段所述方法告知大家，屬後知後覺之類，令人感嘆，對蒙受無辜損失嘅股民來講，只能對李小加講番一句趙紫陽名言：你來遲了（原文「我來晚 了」）。成個港交所咁多人才，人工咁高，點解冇人在八月十日下午一時半開市前已經諗得到上述方法？而且要停牌嘅話，應在開市前已經通告所有經紀，唔應該在 開市後有買有賣之時，才突然停牌。李小加平時辯才無礙，寫萬言書議論滔滔，依家有啲華資經紀開始懷疑佢係講就天下無敵一類嘅高談闊論人士。

PermaLink: https://articles.zkiz.com/?id=27074
Next Page
ZKIZ Archives @ 2019