中國自動化系列 - 保你一頂烏紗 會計仔筆記
http://accountboyhk.mysinablog.com/index.php?op=ViewArticle&articleId=677929
之前提過，新客上左賊船之後年年都要比維護費，而且好難轉去第間，但各企業老總和鐵路局官員會唔會好心有不甘呢?
第一，中國政府對工業安全的要求不斷提高，不斷有新的國家法律和行業標準可見一班，自動化從事的大型石油、石化、化學及鐵路公司一出事就好大鑊。2003年12月23日，四川發生噴井特大事故，死亡人數243人，傷者不計其數。2004年4月，中石油前老總馬富才引咎辭職，負責安全的副總經理記大過。原因是根據《國務院關於特大安全事故行政責任追究的規定》，地方人民政府主要領導人和政府有關部門正職負責人對特大安全事故的防範及發生，有失職、瀆職情形或者負有領導責任的，依照《规定》给予行政處分；構成玩忽職守罪或者其他犯罪的，依法追究刑事責任。馬富才當然唔會理到一個礦井的安全這些小事，但只要下面的人犯錯，就足夠令最上者(政府有關部門正職負責人) 「或者負有領導責任的」丟官查辦。
之前講過中國的CRH 用了法國阿爾斯通、日本川崎重工、加拿大龐巴迪三家。大家都知道內地人好仇日，選用日貨唔用中華之星曾在大陸互聯網引起好大迴響，內地網民更將CRH (China Railway Highspeed) 叫成恥辱號列車，貪其拼音一樣。如果在日本車上死一個人，引起的民俗情仇問題將會令鐵路局極麻煩，這是沒有人想見到的。
好多人都知我好鍾意在行業有技術優勢的公司，貪其高技術可作為門檻。根據招股書，自動化是中國在石化、油氣、鋼鐵、化工這些行業緊急系統的超級龍頭，市場佔有率有68%，市場第二果間有8%，第三果間7%。佢的系統原件並不是自製的，是從英國Invensys 買的Triconex產品，據聞技術上國際知名。
但是Invensys會不會收番來自己做呢? 我想機會唔大。第一，它打算2009年建成一座新的大樓，把可產系統數增至500套，2006年銷出200套，如果有重大不確定因素應該唔會咁做。第二，和其他裝備製造業不同，招股書已說明這些系統基本上套套都不同，個個客都要加點tailor made 既野，需要了解中國的人用中文和客戶開大量既會，外國公司好難自己做；iii) 自動化已和中石油、中石化、鐵路局等大客建立良好關係，這些關係相當值錢；iv) Invensys 經常判中東和新加坡的工程比自動化做，可見關係不錯。
但它的最大門檻、並不是來自技術、而是來自市場佔有率。因為我們看的不是技術優勢，而是為客戶提供的解決方案和其他競爭者的相對優勢。大家試想想，鐵路局官員是官，國企老總其實也是官，坦白說，他們最終關心的並不是安全，而是需不需要'咩'鑊。如果出了重大安全事故，就算不用革職查辦也仕途無望，這才是他們真正關心的。如果不是重大事故，而是中小型事故呢? 由於沒有群眾壓力，灰色地帶就多好多。這就看看你是不是有防範準備。
舉過例，想像下你是從事IT業，你間公司中左毒，如果你完全冇裝Anti- virus，咁就一定死得；如果你裝左隻平價港貨，可能佢未必會差過外國野，但恐怕你也會比人責難。但如果你裝左隻Norton Antivirus，你老細好有可能會想你可做的都足了，只是隻virus 太勁，今次係死於不幸。道理就在這裡，關鍵就是出事時的卸鑊能力，這些安全野，市場上最多人用果隻，或技術上公認最高果隻，出事時的卸鑊能力肯定係最高。官員對卸鑊能力的考慮，往往比價錢看得重十倍，所以就算maintenance fee 幾高都會join maintenance，而且唔會轉。當牽涉到卸鑊能力，決策者對價格的敏感度是極低的。官場保烏紗、卸鑊這是人性和民俗性使然，數千年如出一轍，這是超越任何經濟周期、超越年代、超越時空的。
另外，由於佢係做安全既野，根本冇效益可言，這可以另佢叫價提高。點解? 因為所以大公司買大額固定資產時都會叫我地依d 財會人只去做cost - benefit analysis，計下IRR，NPV 之類，就算隻野幾好，工程部門幾推介，如果計出黎回報太低，都會好難買落去。如果真係要買的就會迫供應商減價。安全野由於冇benefit 可做，財務部完全冇聲出，完全由工程部話事，對成交價絕對係好事。
如果我是國企老總，我真係唔會覺得係比人屈，以2006年銷售200套銷售額218 m計，每套才100萬多點，以一間鋼廠或化工廠以億、十億計，跟本就唔係錢，依d 涉及國家政策，又涉及我頂烏紗既野，當然是(用公家錢)買龍頭果間，抵到爛。
官場卸鑊用品，從來都是暴利行業，君不見香港那些醫療融資、道路收費系統那些垃圾研究報告，份份都過千萬，真係睇到火都黎埋。收得咁貴，正是因為公務員對這些卸鑊用品的極低需求彈性，坦白講，依d 野收得平反而冇人信吧。