|
||||||
|
派福利，唔派猶 自可，一派就會激起紛爭，譬如派六千元，一聲話派啫，永久居民與新移民就有矛盾，關愛基金代派六千元予新移民，要有入息審查，於是新移民之間立即產生怨 氣。又譬喻復建居屋，據講係為了幫助市民置業，講就好聽嘞，一講到細節，就要劃分白表（普通居民）綠表（公屋居民），分收入界線（總有一個收入上限），必 然有排拗。 如果遵照舊制度嘅話，復建居屋只會大利公屋居民，啲八十後非公屋人士第一次置業要買居屋嘅話，機率等於中六合彩三至四個字（估 計），再者，講到價錢，買居屋有折扣，過往係市場價格七成，但如今細單位樓宇嘅市價去到七千至一萬一呎。打個七折之後，無論白表綠表，只要符合購買資格， 都無財政能力承擔，除非佢地個個虛報，故意壓低個人薪酬。 故此新居屋政策如要符合政策宗旨，幫助夾心階層第一次置業嘅話，必須修改兩樣：（一）白表綠表比例大變，讓白表佔多數，提升夾心階層中獎機會；（二）大幅度調低折扣比率，例如去到五成以下，讓夾心階層有能力買入。 之 不過，折扣越多，將來要出手轉讓嘅痛苦越大，因為賣樓時要補地價嘅噃，補番五千蚊一呎喎，去邊度搵錢補呀？意思即係成世人住在居屋，好難移動，影響未來生 活及就業嘅靈活性。僥倖夠運買到居屋，係要嚟住嘅，如要寄望樓價升值，可當為投資嘅話，請保持高度耐性同埋把握時機。過往二十五年居屋史（一九七八至二 ○○三）曾製造了不少千萬元富戶，皆係透過居屋換私樓，私樓換大樓呢個過程（左丁山就有朋友從俊民苑換樓換上干德道），但現在樓價不再是一九七八年嘅七百 蚊一呎嘞喎。由七百蚊升上一萬元一呎，歷時三十三年，共升14.28倍，到咗2047年（五十年不變是否會終結？香港不再是特區？）樓價會否升到每平方呎 14萬3千蚊，一個七百呎單位要賣一億銀？諗吓都驚。 |
||||||