2011-6-6 AD
|
||||||
|
香港赤鱲角機場 是否要擴建，起多一條跑道，已經開始諮詢，預料有兩派意見，以後幾個月會辯論得好熱鬧。一派當然係贊成派啦，包括好幾個智庫、知名教授學者、航空公司等 等；另一派會係啲usual suspects、環保團體等，必然反對，講到最後，分分鐘又會有一位×婆婆出現，申請司法覆核，阻止機場興建第三條跑道。咁講法，大家拗多十年啦，等到 新加坡有新機場之時，香港機場第三條跑道或者仍然未動工。 你問我，我一定贊成三年內就開工興建第三條跑道，最近去新加坡打個白鴿轉，真係覺 得香港再係懶懶閒嘅話，新加坡在GDP總值方面今年已經追上香港，將來會將香港越拋越遠。新加坡的確做事好進取，令香港人意想不到。有一晚消夜之後，坐旅 遊巴返回酒店，經過最繁盛嘅烏節路，人流最多嘅幾段路過咗之後，右手面有幾棟低座建築物，似乎唔係一般商業大廈，於是問吓導遊，導遊話：「就係SMU所在 地啦。」唉吔，SMU即係新加坡管理大學（Singapore Management University），近年在世界商學院排名榜上，崛起甚速，久聞其名，但一間歷史不長嘅大學，點解要揀在商業中心區興建？如果我地在油麻地彌敦道興建 一間「香港管理大學」，你估特區政府制唔制呢？淨係計地皮價值已經會鬧到滿城風雨。人地SMU在2000年成立，於地價、租值極高之Bugis- Bras/Basah商業區興建，以美國式大學為營運模式。點解要在市區建大學呢？相信係依照紐約NYU、倫敦LSE方式，讓學生學習管理、經濟、會計、 法律之餘，一出校門，就進入商業世界，不與現實脫節。 SMU之迅速冒起，正顯示新加坡政府之劍及履及嘅務實精神，係強勢政府表現，與香港特區政府之弱勢相差甚遠。香港至今仍然不被新加坡拋開，應該歸功行之有效嘅自由市場制度，政府冇用，但工商金融界照樣運行無誤，照樣有增長，但呢個政府越來越似成為香港嘅負累，咁先至死火！ |
||||||