|
||||||
|
新加坡馬場嘅設 施，飲食與投注氣氛遠不如香港，普通賽事嘅獨贏投注額好低，大約係十幾二十萬坡紙一場，香港馬場嘅「燈神」，可以一注就打爆新加坡馬場電算機。投注方式有 三重彩、四重彩、連贏及位置Ｑ、單Ｔ，但冇孖寶、冇過關，而三重彩又冇複式膽，只有單式膽之設。最獨特嘅係馬主好少出現，拉頭馬影相嘅人好多時係代理人， 據講新加坡雖然開咗賭場，但當地有錢人不敢進場，做馬主就多以團體馬為遮掩，一位地產大富豪養好多馬，但從不到馬場拉頭馬影相，怕俾人知喎。香港商界人物 都唔知幾鍾意到馬場影拉頭馬相，情況恰與新加坡相反，畢竟新加坡雖然非常進步，但政府影子無處不在，開賭雖然係政府政策，當地人民聽從，有錢人則心知肚 明，唔敢在新加坡行差踏錯，唔敢「被認為」好賭。 低下階層就唔同，左丁山在金沙賭廳周圍行，見到不少類似南亞裔勞工階層（持外國護照者可入 內）賭錢，當然更有不少講普通話、馬來話嘅人士，本地人入場要付費（levy），好似係每位一百五十坡紙，正是未見官先打八十，但至今新加坡人已經付費億 幾坡紙，可見本地人都幾鍾意入賭場玩吓。對左丁山嚟講，最弊周圍都係煙味，金沙賭場內不少賭客揸住支煙，非煙客欲避無從。新加坡唔係室內禁煙嘅咩？不過搵 錢道理放諸四海而皆準，總之見錢開眼，人客永遠是對的，賭場內最尊重賭錢之人，佢地要吸煙，咪由得佢地囉。 左丁山多留一日，遷往金沙酒店， 又見到一啲來自香港嘅馬主，據馬主Ｆ講：佢嘅當地商界朋友請食飯之後，帶佢到賭場門口，但自己唔肯入去，令馬主Ｆ感到非常奇怪，亦感嘆一聲：「新加坡政府 真係巴閉，無形影響力巨大，咁熟嘅朋友，都唔肯陪我入賭場！」呢位朋友係唔係清教徒呀？馬主Ｆ話：「當然唔係啦，我帶佢到澳門永利，佢都唔知玩得幾高 興！」金沙酒店外形雄偉，三座高樓承托起一個放在天台嘅船形泳池，極度矚目，成為遊客必到之景點（天台泳池只限住客上去），但內裏建築就似係急就章，憑設 計取勝而已。 |
||||||