| ||||||
本週一小宗收到一封匿名傳真，一班自稱「美聯基層」嘅員工，話會喺集團總部向董事局遞交請願信。呢啲事，對美聯集團（1200）來說，當食生菜啦！兩年前，美聯兵變已上演過，逾百經紀操上總行大叫：「我要見主席！」搞咗兩日先平息，集團副主席黃錦康亦離職。今次弱雞好多，四、五十人，口號都無一句，攞住張放大咗嘅公開信影嚇相，廿分鐘唔夠走人。 今次嘅主角係前港島區董事楊永健，佢話自己年三十時「被辭職」，但美聯就對外宣稱佢係私人理由離職。最搞笑封信唔係申寃，而係叫副主席、創辦人黃建業個愛女黃靜怡落台，指佢「無建樹、逼走戰將、用人唯親」咁話。其實，楊永健係美聯前行政總裁、已離職嘅陳坤興一路人馬，而家美聯只係傚法習總──清除餘孽。唔怪得有兵變後紮咗職嘅董事，發出WhatsApp溫馨提示，叫屬於自己友嘅員工，千祈唔好現身兵變，否則必食無情雞！ 聽美聯中人講，美聯內大部分董事皆紅褲仔出身，最叻搵錢，太子女則係零經驗會計師。生意好時大家開心，生意唔好時，就梗係容易爆鑊。至於做細嘅，則企埋一邊剝花生，仲口痕話：「做得經紀都係向錢看，邊個坐董事局關我哋×事咩！」 職場秘笈病都照開工 港大建築系畢業，由一個小小的項目經理，扶搖直上，升任至富豪國際（78）、百利保（617）及世紀城市（355）的董事。他每期分享不同的職場經驗及秘笈；要上位，無往不利。我在八一年於香港大學建築系畢業後開始打工，至今已有三十二年打工經驗，其間我轉了三次工（第一份工只做了半年，未有計算在內），我在八七年入第三間公司（即現時的富豪國際），一直做到現在，已二十七年了。我由一個普通項目經理慢慢升至一間上市公司的COO、兩間上市公司的執行董事及一間上市公司的非執行董事。想成功的打工仔一定有以下的信念和條件。第一，做任何工作一定要上心，不理事大事小，要當作自己開的公司或自己的事來處理，而且一定做得比別人開心，做得更盡力，做得更完美和做到一百分。若只用打工仔心態做，最多做到八十分已覺得心滿意足，對得住公司有餘，那剩下二十分誰來填？我有一個實例：九二年時我處理一間酒店的發展項目（同時間亦有其他項目在手），酒店項目歷時三年，中間大小事情，都要經我手，項目將近竣工時，我無意發現自己腹部有一水瘤要切除。由於希望酒店盡快開門做生意，所以分秒必爭，更不能容許自己請假入院，影響軍心，但水瘤不切除，就會愈來愈大及變壞，考慮之下，終於選擇一個星期六下午，放工後馬上入院切，星期日休息一天，星期一拿住枴杖照常上班，向下屬們說只是拗柴，惟獨大老闆雖沒出聲，卻心中有數。 黃志祥年初一禁用掃把 中國傳統，大年初一，千萬不能沖涼或洗頭，更加唔可以打掃，輕則掃走運氣，重則破財兼衰氣跟足一年。不過，現代人一於少理，污糟邋遢點見人？但有金融界線眼同小宗講，話一向唔信邪嘅信和集團主席黃志祥，今年一改作風，親自落order要信和旗下的酒店清潔工，喺年三十晚凌晨十二點開始，收埋曬所有掃把、地拖，不准掃地同吸塵！如有煙頭、紙巾等大件垃圾，就用手執，搞到清潔嘅同事要成晚踎低起身，就快「見頭暈」。莫怪黃志祥信邪，好似黃金海岸酒店，室外嗰個可擺十幾廿圍婚宴嘅帳篷一向最吸客，之前被人話僭建而要拆，至今都未申請改建成功。無咗筆婚宴收入，又少咗「零團費」自由行來港，啲三、四星酒店大受影響，北角城市花園酒店條數就唔多靚，出租率同房價雙雙下挫。唔老黎，信嚇「傳統智慧」都無壞嘅！ 經紀利是縮水$10再現 每年嘅新春團拜，都係經濟環境嘅大指標。四大地產代理行，幾乎年年都派利是。早幾年旺市，幾乎全部都係紅紅綠綠（一百、五十蚊也），上市嘅美聯更曾豪派兩嚿水一封，但今年，大部分董事都只係廿蚊一封，足見樓市交投之疏落也。而近十年已絕跡江湖嘅「十蚊雞」，今年竟然重現江湖！喺利嘉閣同港置嘅團拜都收到！中原地產今年更索性取消團拜。查實，新春利是都係攞個意頭，樓市交投被政府辣招辣到縮曬水，經紀花紅唔見一大截，交投再跌落去，大家還是留番筆錢傍身罷啦！ 金牙大狀講嘢竟無一個是男兒 特區有WTF林老師，強國有TMD李娜，花旗則有Fuck The EU助理國務卿盧蘭（Victoria Nuland，耶倫唔用聯儲局「女主席」稱號，依此先例，盧蘭亦非「女助理國務卿」也）。學得習總話齋，環顧天下，有此豪氣者竟無一個是男兒。咁唔得嘅噃。五代花蕊夫人之《亡國詩》有云：「君王城上豎降旗，妾在深宮哪得知；十四萬人齊解甲，寧無一個是男兒。」習總2012年12月「南巡」至深圳，講到蘇聯崩潰，慨然而嘆，曰：「最後戈爾巴喬夫輕輕一句話，宣佈蘇聯共產黨解散，偌大一個黨就沒了。按照黨員比例，蘇共超過我們，但竟無一人是男兒。」唔怪之得李娜贏咗澳網冠軍後，即有人起鬨，話要搵佢做人大。不過，呢啲人睇嚟拍錯馬屁矣，習總擺到明係要搵李娜入黨噃！ | ||||||