|
||||||
|
香港骨灰龕場唔 夠，唔少孝子賢孫為咗令先人「住」得安樂，惟有將佢哋嘅遺體移去第二度安葬。隔山買牛已經有難度，何況買棺材山地。不過，互聯網世界，無遠弗屆，早前玄學 家楊天命就夥拍仁智國際（8082）度咗條好橋，以網購方式，幫孝子賢孫為先人喺內地搵吉穴。事隔幾個月，呢個網購服務終於面世。前幾日楊天命同華華講， 呢個禮拜五（20日）舉行嘅「香港長者博覽」就會正式公佈詳情。 網頁附程式揀穴夾八字 不過，華華當然要先行收風，楊天命話， 自從做咗仁智國際嘅顧問之後，親自去咗蘇州好多次，睇吓仁智早前買落嘅蘇州市「名流陵園」，做實地考察。佢話睇完之後，將陵園分成咗幾個區，好似C1同 C2區係「甲山庚向」，利後人財富興旺，C2區仲加埋大利升官，M2區就旺人丁。佢仲諗到，首創預先「點穴」服務，喺網上公開上述嘅墓穴風水資料，畀啲客 人因應自己要求揀吉穴，省得百年歸老嗰陣倒瀉籮蟹。 乜揀吉穴唔係要夾先人同後人時辰八字o架咩？原來楊天命搵人編寫咗個電腦程式，只要客人將個人時辰八字輸入，電腦就可以幫先人揀最適合嘅區。華華百無禁忌，即刻上仁智嘅網睇，可惜「墓地選購」嗰欄仍然建設中，仲未可以見識吓呢啲咁「體貼」嘅服務。 李華華 |
||||||