ZKIZ Archives


中環在線:ICC新酒店開幕大郭隔空賀兩弟 李華華

2011-5-4  AD




 

環球貿易廣場 (ICC)嘅Ritz-Carlton噚晚開幕,據聞自從中環Ritz-Carlton結業到噚晚重開,足足相隔三年三個月零三日,湊成3個三字!且 慢,ICC由新地(016)發展,你話如果郭氏三兄弟同場出嚟剪綵湊夠4個三,咁就真係別具意義。可惜,噚晚華華收到郭炳湘發出嘅「賀電」,話同阿媽郭老 太鄺肖卿外遊,慶祝母親節。人不在港,但都越洋祝賀,大郭對ICC又真係幾鍾情。

華華收風,原來大郭好proud of國金二期IFC同ICC兩個項目。皆因當年係佢話要發展,其中IFC得到四叔李兆基支持,但ICC就要由新地獨力發展。正值99年地產市道唔係咁好 景,要投咁大個項目,真係有啲風險。不過,大郭覺得呢個九龍站5至7期綜合項目,可以起寫字樓、住宅、商場同酒店,九龍冇乜咁嘅項目,所以好想投落嚟。於 是搵阿媽支持,郭老太見個仔咁講,就過問項目,最後支持大郭投返嚟。

獨力投資搵阿媽支持

不過,華華又收到風,當年大郭的確係 「力排眾議」,而且唔只呢單項目「力排眾議」,而係單單都唔聽人意見,而且專買貴嘢。話說,當年佢成功投標呢個九龍站5至7期返嚟後,新地內部就有人質疑 係咪買貴咗?甚至有人話某君最愛買貴嘢。睇番當年「見光」嘅條款,項目補地價56億,新地除咗同意將第5同第7期合共89萬平方呎樓面商場擁有權全數交回 地鐵,有關商場租金比例,新地開列嘅亦都比標書中要向地鐵提供七成租金嘅比例高。

今日睇,大郭又的確幾「獨具慧眼」,但香港樓市10年又點止幾番新,可能因為佢太過「力排眾議」,最後搞到「帝位」不保。

李華華

[email protected]


PermaLink: https://articles.zkiz.com/?id=24839

Next Page

ZKIZ Archives @ 2019