ZKIZ Archives


酒店由低做起 左丁山


2011-3-30  AD




 

無論在機場買臨 時機票或即興之下到酒店租房,價錢通常比上網預訂或經旅行社預訂嘅票價、房租貴好多。餐廳R就在倫敦有過不止一次呢類經驗,故此佢經常話:「Walk- in rate is the walk away rate」一聽見就立即要走開,同人鬧交有乜意思呀。香港人在香港遇到呢啲事,總會有時大吵大鬧,狂轟海鮮價,「趁火打劫」,但去到紐約倫敦投訴呢啲事, 根本無人理會。

一啲成年人喜歡自我中心,投訴成風,一啲後生仔女亦自我中心,拒絕捱苦。呢日報紙有報導話本港大學酒店系畢業生不想做侍應及 執房打掃,職訓局訓練酒店從業員更加啱用,此報導唔會冇根據嘅啩?香港酒店業主聯會執行總幹事李漢城講嘅噃!如係實情,呢啲大學生未畢業前快快轉系算咯, 讀乜鬼酒店系呀,一畢業出嚟就要做酒店行政人員呀?酒店小YY以前讀完碩士先至去瑞士讀酒店管理,執房、掃廁所、鋪床單、吸塵及捧餐,全部要學齊,後來在 紐約豪華六星酒店做Butler,仲要代客擦鞋,做F&B嘅同學,無一不做廚房、捧餐開始,乜香港啲大學生咁矜貴呀,如此惜身,他日何來競爭力, 讀酒店辛苦喎,做酒店就更加辛苦到癲,怕就快啲walk away。

香港有兩位高官嘅仔女都鍾意做酒店,財爺曾俊華兒子在五星酒店做F&B,每日工作時間仲長過財爺,周一嶽局長千金在瑞士讀酒店,又係鍾意做餐飲業,唔知辛苦兩個字點寫。

北 京有位香港女士C開日本餐廳、咖啡室,非常成功,算係上咗岸。十幾年前左丁山仲識得人,介紹佢去見一位酒店高層,高層問佢怕唔怕辛苦,到北京捧餐兼管理間 咖啡室,佢話在美國讀酒店系時已經常做兼職侍應,冇乜所謂。結果呢,酒店請咗佢,上咗北京,佢累積經驗後自立門戶,在北京搵到真銀。今天香港年青人倘若一 怕苦、二怕難,唔會有前途。今天五星酒店之總經理大都係德國人、瑞士人,不少在廚房刨薯仔開始,做呢行,唔需要太多書本理論,服務做得細緻體貼先至緊要。


PermaLink: https://articles.zkiz.com/?id=24275

Next Page

ZKIZ Archives @ 2019