正所謂「不在乎天長地久，只在乎曾經擁有」，財政司司長陳茂波任期即使只有四個多月，也要豪花公帑兩百萬，曝光後縮至八十三萬裝修財政司司長官邸，一生人總算由石硤尾南山邨木屋區攀上港島南區壽山村道，一過財爺之癮兼且光宗耀祖，原本豪裝官邸其中一項最大開支的工程是剷起網球場重鋪，數口咁精嘅局長何解鍾情網球場呢？ 陳茂波現時居住的跑馬地禮頓山單位，建築面積1,911呎，實用面積1,461呎，雖然會所設有一個網球場，想享用要預先一個星期book場，日間收費$50一小時，晚間收費$70一小時，貴為馬會遴選會員，雖然到屋企附近山光道馬會會所都有網球場嘅，同樣要預先book場，又點及得喺四萬呎官邸有個網球場隨時免費「開波」。 曾江都要寫個「服」字俾局長 教育局局長吳克儉以一頭白髮，作為他退休的藉口，其實接掌局長呢個位之時，吳克儉已六十歲，唔通個頭仲會烏卒卒？實情是，局長為保青春經常染髮，一月初才碰到他走到中文大學校園內的髮型屋——Comer理髮，只不過局長頭髮稀疏，染髮最多頂到兩個月，所以滿頭白髮正好配合其退休大計這場「騷」，於是上電台前只修剪頭髮而不染髮，真係曾江都要寫個服字俾你，立即變白又得，得咗！ 中環寸嘴：優承庭訓老豆嘅風吹皇帝褲襠 工廈大王楊耀松長子，八十年代往北美洲開山劈石，做一帶一路先頭部隊，自比為星仔變星爺前冇人懂欣賞其無厘頭文化，廿年後終於領略當中奧妙，與粉絲分享在北美洲各路人士交手經歷，絕不老點。 三月份喺亞洲協會（Asia Society），Van Cleef & Arpels搞個藝術展覽，小弟才疏學淺，見盡呢十幾年間，阿豬阿狗都做榮譽博士；不過我硬係見得好嘢多，個人嘅期望又高啲啲咁，早就飲咗頭啖湯，舊年喺新加坡ArtScience Museum，睇過Van Cleef & Arpels珠寶品牌展覽，仲有成四百幾件展品，新加坡佬就識搞，呢啲就係商業元素嘅展覽，廿蚊坡紙一張飛，都大把人排住隊去睇，因為我都要研究吓邊啲品牌up and coming，或者downhill；我哋有錢唔係亂使； 我哋有家教，正所謂「優承庭訓」我老豆嘅「風吹皇帝褲襠」，即「孤×寒」，我只限老婆每件名牌買一件，要多一件要向我老子申請撥款。 去新加坡，我作為高端消費旅客，何止睇珠寶展覽，梗係去米芝蓮餐廳食番餐，個老友揀咗間米芝蓮一星，睇晒全Marina Bay景嘅法國餐廳JANN，全間餐廳話就話得四十個位，講到好難book位咁，嗰晚就得三枱客，食法國餐真係好講presentation，整成大煲鴨胸俾你望一望，嘩，以為每人一煲，今次食唔晒打包都得啦，哈，原來每人切一嚿仔，三枱客都係食嗰隻鴨，每人分一份！ 胡家驊逝世會員等攝位 前港姐吳婉芳丈夫胡家驊英年早逝，其愛駒「喜蓮獎星」週日在馬場勁力十足，贏得第三場女皇銀禧紀念盃冠軍。胡家有白事，找來許晉亨拉頭馬，其實許晉亨與胡家驊年紀相差一年，自幼在英國一齊讀high school，friend過打band，而且胡家祖父輩胡兆熾及許家祖父輩許愛周是世交，家族成員五、六十年代皆已養馬，活躍於馬場；胡家驊貴為馬會遴選會員（voting member），全港只限二百人，不少會員都覬覦呢個馬會會員身份，因為可以推薦友人做full member，咁先有「飛士」，冇番咁上下名譽地位以及「時日」難以上位，通常等voting member年滿七十歲升上榮譽遴選會員，才空出個位置；唔少對voting member流晒口水嘅馬會會員都「吼」住胡家驊個位！ | ||