http://partipral-hk.blogspot.com/2011/03/0458hk.html
收入30億, 同比增加7%, 下半年比上半年多27%; 毛利8億, 同比增加24%, 下半年比上半年多143%; 銷售開支同比增加25%至2.1億; 行政開支同比增加10%至4億; 純利扭虧全年賺近2億, 比上半年多出4倍以上......就算撇除賣廠收益, 純利亦達1.65億, 屬歷史新高.......完全冇辦法可以估計得到既佳績....
毛利率大幅提升近4個百分點至26.3%, 最大原因係自己最關心既零售分部貢獻甚巨. 收入達6.6億, 全年單計此分部已賺近7千萬, 比上年度多出2倍, 下半年亦比上半年多賺多超過2倍. 製衣分部營業額同上年持平, 盈利增長6成至8千萬. 雖然製衣仍然係集團盈利主要來源但比起08年高峰期仍有1千萬差距, 如今對聯亞來講製衣業務可視作持續復甦狀態, 但未來增長亮點肯定會響零售業務上.
應收賬, 應付賬以至存貨增幅都同營業額相若, 收入數字應該可信; 喜見短期銀貸由中期既3.3億回落至1.9億既較理想水平, 手持現金高達4.6億即等如淨現金2.7億, 財政狀況非常健康.
估值方面, 撇除賣廠收益全年賺1.65億的話即每股盈利$0.61, 全年派息$0.30即大概等如以往既4成派息率 (計及特殊收益後的4成派息率). 現價$2.86即P/E不足5倍; 息率10.5%.........
雖然我久唔久都行下香港既NAUTICA, 但見佢都係拍烏蠅多, 估唔到依家聯亞既銷售點講緊係已經去到420個, 當然佢仲有JACK WOLFSKIN, 但有此成績絕對係超出想像好多好多......依家既聯亞已經係似一隻零售股多於傳統製衣股, 零售股得5倍P/E, 息率10厘?? 咁你仲掛住買BAUHAUS??
聯亞呢份業績係痴線既, 所以聽日都唔知會升到去邊, 總知股東們綁好安全帶就OK. 以我自己買入價$2.02計, 股息率15厘, 如果你問我聯亞合理價係幾多, 我諗大約在核心盈利計 P/E 10倍 / 股息率5% 之間, 即大約$6左右. 不過唔好忘記聯亞既零售業務既增長係完全唔知可以去到邊度, 我諗就算真係去到$6, 我都未必會賣黎益人, 總之我自己就會安心等待聯亞繼續成長, 有排都唔駛點諗賣出了.
修正: 核心盈利應為1.50億而非1.65億, 即每股核心盈利為$0.557, 眼大睇過龍了.