|
||||||
|
政府派錢一事， 左丁山所遇到嘅市民，未見過話唔開心嘅，但開心之餘，又關心幾時錢銀到手。派錢畀六百萬人，算係茲事體大，技術問題不可輕視。退稅就比較容易，稅務局有齊 納稅人資料，將退稅以支票形式寄到納稅人地址，相對地容易，但納稅人總數大約係百二萬左右，而香港永久居民有六百一十萬，即係話差不多有五百萬人嘅地址， 政府未必完全掌握得到。 聽銀行界人士講，金管局已經搵咗銀行代表開會，商量如何處理，頭痛問題是港人有冇銀行戶口，供過數之用，而係不少人 有戶口太多（按：例如左丁山一人就有五個戶口），政府直接過數嘅話，入落邊個戶口先至啱？事先如何取得個別市民之確實指示？至於完全冇銀行戶口之市民，應 屬少數，但只要有十分一，已經有幾十萬人，如何將錢送到佢哋手上，問題不少？ 大編輯有澳門、香港身份證，收完澳門派錢又有香港派錢，都幾過 癮。澳門點樣派錢o架？佢話澳門人口少，寄支票可也，佢個姪仔遠在英國某細小城市，一樣收到澳門政府寄上之支票，不過係澳門幣，佢拎支票入英國滙豐戶口， 大概一個月後先至可以確認戶口內收到幾多英鎊，但左丁山就幾懷疑香港特區政府有無新界村民移居英國之後嘅英國地址咯。 左丁山見賓架X為此諗 到皺眉頭，於是對佢講：「此乃快樂之煩惱，總好過無米炊之煩惱，你哋銀行家咁醒目，一定同政府共同諗到辦法嘅！」乜唔係呀，曾俊華因為派錢而俾泛民鬧，美 國人會視為奇蹟，威斯康辛州嘅教師工會一定會羨慕到暈，香港教協叫老師上街與威斯康辛州教師工會叫人上街嘅理由完全不同，後者係反對裁員，反對州政府削減 福利呀！金融時報一位專欄作家David Pilling（三月十日）講幾千香港人上街示威反對派錢六千元係為咗反通脹，唔想派錢為通脹火上加油，真係好笑到極，泛民幾時有講過呢啲嘢呀？洋人只識 睇《南華早報》就真係論盡到極。 |
||||||