📖 ZKIZ Archives

新聞雜評（一百三十二）（2nd edition）

中大畢業典禮遇示威　沈祖堯：行動並不適當
撰文： 胡家欣 發佈日期： 2016-11-17 12:26 最後更新日期： 2016-11-17 13:09

中文大學今日舉行畢業典禮，有數十名學生在國歌起奏時，舉起印上反「釋」字的紙牌，不滿早前中央就《基本法》104條主動釋法。畢業禮結束後，中大校長沈祖堯接受傳媒訪問時表示遺憾，認為行動並不適當。
兩年前學生撐傘獲讚賞　今日：行動並不適當
對於有學生在畢業典禮的示威行動，中大校長沈祖堯表示遺憾。他指畢業禮是「莊嚴」及大學畢業生重視的場合，示威行動並不適當，希望其他同學可以互相尊重。當他被記者問到會否尊重學生反人大釋法的意見，沈祖堯就說：「我今日唔想再答釋法等問題，因為今日係我哋的畢業禮。」
不過兩年前，同樣是中大畢業禮，有近50名畢業生在典禮環節撐起黃色雨傘，以示對真普選的訴求，校長沈祖堯當時接受傳媒訪問時表示尊重學生表達意見自由，強調頒授過程順利，對此讚賞。
普通話發言惹反感　
沈祖堯在典禮致辭其間，先以普通話祝賀畢業生，其後再以廣東話及主要以英語發言。對於有學生表示不滿他開初以普通話發言，沈祖堯解釋過去畢業禮都會用普、中、英三個語言，無刻意安排次序，「好似都係咁上下，唔記得以前係咩先，我諗係邊個容易，邊個行先」。
沈祖堯即將卸任校長一職，他指今次有可能是最後一次主持畢業典禮，「有少少感觸」，他希望下任校長可以繼續帶領中大，但未有評論應具備什麼特質。他在致辭時指，過去七年經歷「三三四」學制改革、政治動盪、意識形態辯論等，感謝院校老師及管治團隊共同面對解決挑戰。他又寄予學生，「無論你將來成為乜嘢人物，我哋只係活一次，所以要活得不枉此生。」
學生：對校長言論失望
有參與舉示威紙牌的中大心理學系畢業生甄同學表示，對於校長言論未有支持學生行動感失望，又質疑校長先以普通話致辭，象徵立場站在政府及中央一方多於香港人。甄指參與示威活動，因為近日宣誓風波及人大釋法，威脅本港三權分立及法治精神，「雖然大局已定，但都要表態」。她希望藉場合，讓大眾知道有大學生對政府不滿。
另一位政治及行政學系畢業生陳同學亦有參與示威行動，他認為雖然《基本法》賦予人大釋法權，但本港司法體系有足夠能力處理，釋法條文是「僭建《基本法》」，影響一國兩制及民主發展。對校長指行為「不莊重」，陳同學不同意，他認為行動只是「默默表達意見，無干擾儀式及唔莊重」。他又指不同意校長以普通話先發言，但予以理解，「校長崗位，人在江湖」。

【就沈祖堯校長喺畢業典禮發言嘅聯合聲明】一直以嚟，廣東話作為香港人嘅母語，由市民日常生活到各正式場合，都係香港人使用嘅主要語言。而我哋香港中文大學長久以嚟絕大部份課程都係用廣東話嚟授課，直到劉遵義前任校長強硬推行國際化呢樣嘢之後，唔理一眾師生嘅反對同不滿，將部分課程教學語言改做英文。雖然係咁，今日仍然有大部份嘅課程係沿用廣東話作為授課語言，因為廣東話喺我哋香港人嘅母語，用嚟教書，會幫到同學學習，事半功倍。再講，廣東話有九聲，講嘢嗰陣有明顯嘅抑揚頓挫，令到感情更加突出，聽嘅人更加容易咁理解同埋體會；而廣東話嘅用語生動同活潑，令到話語會更加傳神，令到語言更加有生命力。
但係喺今日大學莊嚴嘅畢業典禮上面，沈祖堯校長竟然背棄我哋香港人嘅母語、我校教學嘅主要語言，先用普通話致詞，之後先用返廣東話致詞，令到同學大感震驚同埋憤怒，不禁疑惑，今日究竟係香港中文大學嘅畢業典禮，定係深圳中文大學嘅畢業典禮？沈校長今日先用普通話為畢業典禮致詞，除左向中共政權獻媚，表達政治效忠之外，實在無其他嘅理由做呢樣驚人嘅舉動。月前沈校長先至訓示過我哋學生，百萬大道喺一個莊嚴嘅地方，大學畢業典禮作為一個神聖嘅場合，同學應該係俾返充分嘅尊重。如今，喺校徽下面，喺畢業典禮上面，喺眾師生面前，喺致詞嘅時候，利用呢個機會，行呢個獻媚之舉，表達您嘅政治效忠，侮辱咗神聖嘅畢業典禮，實在可恥。喺呢到學生敢問校長一句，唔尊重呢個莊嚴之地，唔尊重畢業典禮呢個神聖場合，喺同學，定喺沈校長您？
對於中大人嚟講，沈校長您嘅態度，唔只有欠讀書人應有嘅禮貌，身為文人學者，身為一大學之長，風骨蕩然無存，實在有負同學嘅期望，有負大學嘅期望，有負社會嘅期望！引述沈校長您嘅說話，面對中大嘅校訓「博文約禮」，您情何以堪？
今日沈校長用普通話致詞之舉，實在係傷害咗中大人嘅感情，學生我等希望您反思作為大學校長身分嘅一言同埋一行，為我等愛護嘅中文大學，慎言慎行。
崇基學院學生會
新亞書院學生會
聯合書院學生會
逸夫書院學生會
和聲書院學生會
伍宜孫書院學生會
敬文書院學生會
香港中文大學教務會學生成員(社會科學院)孔浩名
二○一六年十一月十七日