|
||||||
|
由彤叔長孫鄭志剛打骰嘅新世界百貨（825），近期出咗本類似發展史嘅書，個名叫做《新路璀璨》，原來新百貨已經有成17年歷史。唔好睇少17年嘅歷史，入大陸發展嘅港商，新百貨都算係早期，本書仲講咗唔少新百貨初開業嘅嘢，由開業到上市，結合咗鄭氏三代嘅努力。
原來新百貨起初係由彤叔領導，以地產帶動百貨向大陸發展；而第一間新百貨嘅選址就係由佢個仔純官建議，本書引述當時純官開董事會嘅時候話：「如果佔領武漢市場，就意味佔領中部地區嘅市場，仲可以輻射半個中國。」唔使講，第一間新百貨就係喺武漢！ 而長孫鄭志剛，喺07年帶領新百貨上市，佢喺本書度，除咗寫咗封信畀員工之外，仲有一個訪問，作為新一代話事人，當然要講下未來嘅發展方向啦！ |
||||||