業績簡評 - 才庫 (0550.HK) PARTIPRAL 派得好
http://partipral-hk.blogspot.com/2011/02/0550hk.html
全年營業額升65%, 下半年比起上半年收入多出1.2億; 全年毛利3.2億, 下半年毛利比起上半年多出近6千萬; 銷售費用微增而行政成本不變, 導致純利勁升超過8成至1.57億, 下半年純利比起上半年亦增近4千5百萬, 單單係下半年賺既1億已經多過上年度全年純利, 表現非常突出. 老實講我之前冇深入研究過呢間公司, 早幾日用白痴方法推算全年純利1.1億可能過於草率及武斷, 但我相信每股賺$0.50都好大可能遠超市場預期.
應收帳大增但多出來的絕大部份都係來自同南航簽新約既按金, 而應收帳總體增幅同營業額增幅相若. 因乜解究又要借多5千幾萬呢? 純粹個人估計, 應付帳不升反減, 即係有D數要即找冇得拖, 難怪會有短期週轉壓力, 短債多左幾千萬都算講得通.
下半年派息$0.065+特別股息$0.035, 再加埋中期股息$0.03, 即係全年計每股賺$0.50而派$0.13, 派息率26%. 好老實講, 呢間公司越賺越多錢但派息率就越搞越低, 管理層都開到口話唔滿意股價表現, 遲下會有新搞作, 但我諗你不如穩定番個派息率會更加實際. 其實呢度真係有小小疑問, 何解佢唔可以派高D息呢?
另外搞鬼之處係上半年管理層仲大肆唱淡, 但新出爐呢份報告入面管理層已經改哂口風話對前景感到樂觀並充滿信心, 如果套用相反理論, 即係下期業績又會轉差?
姑且唔理咁多野, 單計EPS $0.5, 現價 $2.20 即P/E 4.4倍, 派息$0.13即股息率5.9%, 算係好抵架喇, 即是話如果你唔介意佢派息率連年遞減 (又或者搏佢將來派息率見底回升), 唔介意佢核數師係均富的話, 都可以諗下買佢, 但聽日可能開市已經MARK高左十幾個%了.