好多時，做刁都難免要俾身份證副本俾交易對手，特別係做果啲俗稱placing嘅大手股票交易，只要涉及鎖貨果啲，都會要求交易對手俾身份證副本。只不過，依家強國人啲做生意手法，就令越嚟越多人，對做刁果陣果陣俾身份證副本感到猶疑。
中環呢排成日都出現，有上市公司高層，或大證券行高層嘅身份證副本好似掛招咁周圍貼，而且唔係追債，而係似係做刁嘅糾紛。當然，當中誰是誰非，我中環客識條鐵咩。但身份證副本周街貼呢啲文革手段，唔單只唔應該提倡，而且一定係有違私隱。我想問呢種手法，同大耳窿或有黑底果啲收數公司嘅手法有乜分別。
其實私隱專員應該留意一下身份證副本俾人咁用法嘅問題，呢種手法如果無人制止，以後做刁無人想俾證件副本，喺好多事上，特別做刁前嘅盡職審查工作會好麻煩，因為盡職審查亦涉及反洗黑錢果啲審查，咁你無證件副本查條毛咩。
有啲強國人民嘅做生意手法，實在太得人驚，香港要保住金融中心地位，對呢種手法係要作出制止至得。
中環客