http://partipral-hk.blogspot.com/2011/02/3918hk.html
全年純利約3.4億港元, 即每股盈利約港幣$0.165, 按年大升7成, 由於早前已經發過盈喜表明上年度下半年業績會同上半年相若, 雖然業績靚仔但應該早在市場預期之中. 每股派末期息$0.06加上中期已派$0.055即全年每股派$0.115佔盈利7成, 都算幾疏爽.
今個年度收入大升之餘而銷售成本反而下降, 令毛利率大幅度提升至71%, 非常恐怖. 官方解釋係非賭團收入佔集團總收入比例大降, 當然最實際既原因係在於 " 本集團持有由柬埔寨皇家政府「東埔寨政府」）發出的賭場牌照（「賭場牌照」），並獲授權於柬埔寨境內經營賭場業務，有效期由一九九五年一月二日起計為期 70年，當中約41年可在柬埔寨金邊市方圓200公里範圍（柬越邊境地區、Bokor、Kirirom Mountains及Sihanoukville除外）內獨家經營賭場。" 獨市生意, 想唔發過豬頭都難啦...
應收帳又再大降, 參考舊年, 原因應該係 "公司亦終止向客戶提供信貸額度的政策，從而不再承受賭客的風險及減少應收帳數目。" 咁事實上賭股應收帳都係不離賭白頭片姐, 與其話佢今年應收帳大降奇怪, 不如話佢以前應收帳佔營業額比例高得離譜. 唔可以賭白頭片即係普通客仔, 亦都對應番上面所講既"非賭團收入佔集團總收入比例大降", 算講得通.
估值方面每股賺$0.165以今日收市價$1.69計P/E 10倍左右, 由於出過盈喜而盈喜都講得好白, 基本上呢份業績對市場而言都應該冇乜驚喜可言, 係派息叫做幾唔錯囉. 出完盈喜翌日股價亦都由高位逐步回落, 自己估計短期內都要消化下趁好消息出貨既獲利盤, 但6.8厘息+10倍P/E唔夠, 就算你嫌柬埔寨透明度唔夠高, 又驚佢無增長, 現價都唔算貴. 自己都係維持番尋日既睇法, 如果你唔介意佢核數師係德豪既話, 都值得買黎作中線投資既. 大約上望空間兩三成至$2.20, 即係預期市盈率13倍左右應該不難達標.