據消息講，中國終於要搞 CDS ，亦即係2008年搞到金融風暴嘅Credit Default Swap，信貸違約掉期。
本來中國出現 CDS 應該係好事嚟，所謂嘅 CDS ，其實係保險，你用市場嘅價錢，買某個國家，或某個公司一旦找唔到數，如果真係找唔到數，就賠番本金俾你。 CDS 嘅本質係保險嚟，原本係提供一個工具，就算你手上嘅債券違咗約，都唔會淨番一堆牆紙，甚至依家呢個電腦時代仲衰，只係一個無意義嘅數字，屆時真係喊得一句句。
只不過，由於買 CDS並無要求買家真係要有實物債券喺手，結果就變成最佳買大細工具，你想賭一個國家或公司破產，就走去買 CDS 。當 CDS 嘅點子越高，價錢越貴，代表違約風險越高。反之，亦然。AIG美國國際集團，就係發得太多 CDS ，雷曼兄弟玩完果嚇，根本無咁多現金去派彩，結果自己做莊做到冧咗。
如果中國早五年搞 CDS ，當時坊間未成日講到要「支爆」，果陣會有人肯做莊家，亦會令債市更健康，反而未必咁容易支爆，因為有 CDS 呢個工具，金融機構可以進取啲喺中國發債，至少有人敢買。但依家中國咁嘅環境至搞CDS，穩定債市未必有你份，但如果中國政府做莊嘅家，隨時有班大鱷利用 CDS 賭到中國政府清袋，同AIG當年一樣。
依家中環客好想知，究竟中國搞嘅 CDS ，係搞出新金融風暴，定根本無人睬佢。
中環客