2011-1-23 AD
記者 Ｔ突然來電 話問及上世紀六十年代嘅滙豐股價，一時難以回答，搵呢啲資料照計唔難，但要花一啲時間，就係到圖書館搵番當年報紙如《華僑晚報》、《華僑日報》、《星島日 報》等等嘅財經版。至於上網可以搵唔搵到四五十年前嘅香港股票價錢，左丁山未試過，唔敢講，真係唔知。有心人可以試吓，搵到請通知一聲。
俾 記者Ｔ一問，左丁山於是在自己嘅私人「圖書室」搵舊書，竟然搵到一本新鴻基證券投資公司編印嘅《一九七二年香港股票投資手冊》。當年可能當呢本冊子好普 通，但係三十八年之後睇番，又幾有意思，譬如一九七二年香港股市十分興旺、創下新高嘅紀錄有：（一）一日成交額多達六億五千九百三十四萬元；（二）一九七 二年首十個月成交總額高達二百九十三億，而一九七一年全年同期僅為一百二十三億三千萬；（三）銀行存款大量增加，九月底之存款多達二百三十一億四千萬元； （四）新股上市特別多，首十個月有五十五隻；（五）置地公司以二股換一股牛奶公司股票，成為香港最大收購。
現在睇番，一九七二年之股市，細小得可憐，不值一提，今日每日成交額閒閒地有七百億元，係一九七二年全年之兩倍！咦，三十八年後（二○四九）嘅香港股市成交又會點呢？每日三十幾萬億元？諗吓都驚。
查 番滙豐股票，一九七二年每手係四十股，實收股本有四億六千二百九十餘萬元，一九六七年高低市價係一百二十一至一百五十七元，一九七一年市價係一百五十九至 二百九十六元，波幅不小，以年中間價計，六七年每手滙豐值五千五百六十元；一九七一年每手值九千一百元（上述價格未經送紅股調整）。至於一九六七年揸住四 十股滙豐，揸至今天不賣，究竟值幾多錢？要逐年翻查送紅股及拆細嘅紀錄，幾繁複，要搵證券公司研究部去搞咯，但單睇滙豐之實收資本在七一年只有四億六千餘 萬計，今天簡直係一條牛毛，同時反映出三十八年之累積通脹及滙豐之高速增長。記住：買三十年債券收息，好容易俾通脹吃清光，設想當年有十萬元，不買滙豐股 票，而買入三十年債券，到咗2002年收番十萬銀，加上三十年利息都冇鬼用啦。