東亞銀行公布咗相當難睇嘅業績後，勇到堅持要進軍牙煙到爆嘅中國消費金融市場，中環客已經覺得呢間銀行好危嚇。只不過，東亞銀行嘅情況，有可能比各方人馬想像中仲要差，大家睇嚇東亞銀行決定要賣筲箕灣道307號同埋慈雲山毓華里分行鋪位，就大概估到依家東亞銀行為咗應付未來越嚟越嚴苛嘅資本要求，同埋中國嘅壞賬問題，仲要撲幾多水。
東亞銀行要削減分行網絡，呢個做法係合理同正路，因為分行呢樣嘢真係成本太貴。只不過，東亞銀行削減咗果啲自置物業嘅分行，大可以攞出嚟租，一如恆生手上成手都係物業，恆生銀行命名嘅大廈分佈市區多個地方，恆生唔攞嚟用果啲，都係攞出嚟放租，照計可以為銀行提供一筆穩定嘅現金收入，一旦日後要擴展番分行網絡，亦進可攻，退可守，根據現有香港法律，業主要收番個鋪自用，無人可以阻止佢。
但依家東亞銀行乾脆賣咗兩間鋪算數，一方面有可能自己都睇唔好鋪位租務，既然自己都隨時成手蟹貨，不如趁依家賣咗兩間鋪，搵水魚接貨攞番啲資本填充一下。另一方面，更可能東亞銀行根本出現撲水難，快快賣鋪攞得幾多現金就攞幾多。依家唔趁成堆中國國企走資買大廈，連中環中心咁都打算吞落肚嘅時候去賣，唔通等條街都係蟹貨至賣？
所以可以預期東亞銀行會繼續賣市區啲分行鋪位，如果連東亞銀行總行以外嘅大樓都攞去賣果陣，大家可以估到下一份成績表應該係更難睇。