|
||||||
|
今年係 MPF（強積金）實施十周年，有不少人痛批強積金冇用，回報少，收費高。有年青人問左丁山點睇，左丁山對佢講：「對我呢一輩就真係冇乜用，供咗十年，供咗 二十四萬元，加上投資回報，先至有三十零萬，若果今日退休，呢筆錢如何維持長流流嘅退休生活呀。不過你就唔同，未夠三十歲，強積金係長期投資，有總係好過 冇，你唔可以完全倚賴強積金嚟退休嘅，其他方面更須努力。」年青人問買乜嘢基金好，左丁山話：「梗係買晒股票基金啦，買保本基金一定輸晒畀通脹，通脹係退 休人士最大敵人，未夠五十五歲，就唔好買保本基金，因住連管理費都蝕埋。」 滙豐保險強積金特別為慶祝MPF十周年，舉行一個黃昏酒會，地點 啱到極，最合滙豐之用，就係在太子大廈頂樓Sevva舉行。十一月三十日晚上，在太子大廈頂樓天台欣賞中環街景，望聖佐治大廈、文華酒店、立法會皇后像廣 場，目睹中環繁華景象，揸住杯白酒享受維港吹來之清風，確有心曠神怡之感。太子大廈斜對面就係滙豐總行，全座大廈有紅白二色燈光照耀，反射過嚟太子大廈， 成為滙豐保險酒會之最佳背景，如果其他銀行在此搞派對，就會俾HSBC招牌搶去顏色咯。對中環人來講，在沒有大風（太凍），沒有雨水的日子，在Sevva 參加酒會，夠晒近便，勝過去任何酒店。不過，呢間係著名嘅貴價餐廳，無錢莫進來，真係非大公司莫問！ 滙豐宣佈明年調低MPF管理費，相信客戶一定歡迎，其他MPF基金公司，是否跟隨，尚未可知，不過大阿哥帶頭減價，必有壓力產生，其他公司嘅管理費唔向下調整若干嘅話，因住客戶鬆人。 離 開酒店，落到樓下行去置地廣場，碰到退休公僕Ｔ，見到佢就諗起公僕有長俸，食到過世，令人羨慕，今時今日，拿長俸勝於拿公積金多多聲，退休Ｔ同左丁山講： 「哎吔，唔好話得我地咁掂，如果純粹靠政府長俸，我都唔敢不時到文華酒店食自助餐，好彩我做咗EO冇耐，未到三十歲就買股票儲蓄o架嘞，揸股票三十幾年， 未賣過，現在感覺非常良好！」公僕Ｔ退休生活夠晒優游，除咗多謝政府福利好之外，亦要歸功於佢老早識得投資！ |
||||||