📖 ZKIZ Archives

英超第一華人班主楊家誠出事後，負面消息未停過，近日江湖就盛傳，佢要將自己做榮譽主席嘅《成報》賣盤，而接貨嘅，係中原地產兼免費報《AM730》老闆施永青，仲話佢買係諗住索性搞多份收費報紙咁話，到底，施老闆係咪真係搞傳媒搞上癮咁呢?

華華噚日搵到施老闆喇，佢同華華講，嚟緊9月份有份新嘅免費報紙對手登場，要集中火力應戰已經令佢有壓力同周身唔得閒，家陣仲話要佢買多份報紙？暫時咪搞﹗不過，佢承認真係有人放聲氣問過佢有無興趣買《成報》。

施老闆又話，當年搞《AM730》，都要機緣巧合、有班底，仲要對手《頭條日報》未出世，先至成功開檔，結果，都要守足23個月，到呢幾年先有錢賺，所以，如果叫佢買份要燒銀紙嘅報紙，佢無興趣囉!

講番楊家誠，呢排都唔見過佢蒲頭，華華側聞佢連旗下伯明翰環球（2309）喺九龍站ICC嘅新辦事處開張之後都好少返去，仲要搬緊D物資返《成報》筲箕灣總壇，唔通隊波降班，連辦公室都要降班乎？

李華華

資深大律師胡漢清和母親莊永楚一段恩怨，隨着胡漢清公開認錯，母子溝通本已打開缺口，事件漸趨平靜；日前新抱江希文忽然連發13微博炮轟奶奶，沉默多天的莊永楚，按捺不住開口指新抱沒有從中調解不特止，更挑起事端，她說：「做咗八十幾年人，都未見過咁嘅人，餘生唔想再見（江希文）。」

新抱再挑事端

上週六凌晨，胡漢清新任太太江希文狂發微博，指摘奶奶不顧親情只往錢看，禮到人不到令訂婚宴充滿遺憾，更直指奶奶捏造事實，屈辱她的人格；以「胡媽媽」稱呼「奶奶」的江希文，本意是為自己和丈夫平反，可惜事與願違，發出微博後反惹來更多網友插爆。而近日刻意避開傳媒，有意息事寧人的莊永楚，遭新抱發炮反擊，心情本已平復的她，也忍不住開腔回敬。「睇完啲報導，個心好嬲，好多朋友都戥我唔抵。」據知，自從胡漢清公開向母親認錯，自揭資金調動有困難，母子關係已稍見緩和，開始有傾偈；豈料新抱忽然再挑事端，令母子和好出現 變數。

裝修費入母數

與兒子相依數十載的莊永楚，一直強調對江希文認識不深。「做人妻子、新抱，無幫手調解母子不和不特止，件事都靜咗成個禮拜，點解仲要再次挑起爭端？我同Alan（胡漢清）母子之間冇戰爭，只係自去年十月開始，五個幾月嚟都冇傾過偈，我咁做都係想同Alan面對面對話 。」江希文在微博中，再次否認向奶奶索取結婚禮物，反指是奶奶主動託人送贈，婆媳版本大有出入，莊永楚說：「當日Alan託朋友同我講，仲傳咗好多次短訊俾我，要攞番呢個古董鑽石翡翠粉盒。」至於說到兒子為她悉心打點大宅，她說：「佢裝修間屋使咗六百萬，但其實可以唔使咁貴，唔裝修都可以住，點解入埋我數。」

勸新抱學江欣燕

莊永楚聲稱每月的二萬二千元零用，是當年代兒子出資百萬搞婚禮時，胡漢清應允支付母親的利息補償；而兩張無限額信用卡，找卡數的錢，也是從交付兒子保管的千多萬現金提取，重申未花過兒子一文錢。當年靠做秘書養家的莊永楚，對兒子的教育，不惜工本悉心培養。「如果換算今日嘅錢，用喺佢身上，真係以過億計。」婆媳各執一詞，莊永楚奉勸新抱說：「做藝人，佢未曾成功過。將來想好好做人老婆，應該向佢家姐江欣燕學習吓，無論做藝人定做人老婆，都比佢出色。佢應該將心思放喺點樣做好老婆，但睇佢今次嘅行為，真係打晒折扣。自己做咗八十幾年人，都未見過咁嘅人，餘生亦唔想再見，唔想再見呢啲人。」

情路崎嶇

入行多年的江希文，事業一池死水，感情路上同樣波折重重，年屆四十一歲，始開花結果嫁給大狀胡漢清，對老公特別緊張，也是人之常情。

老外Rayder

95年美國讀書時與外籍男友Rayder一見鍾情，拍拖六年離離合合，01年一度向外宣布隨時收山，跟男友到洛杉磯結婚，但最後仍是分手收場。

李國祥

05年，與過氣歌手李國祥暗交，兩人態度親暱，拍拖食飯行街，但江希文一直未有承認戀情。

經理人余錦輝

09年江希文到內地發展，傳搭上經理人公司老闆余錦輝，並獲贈一層價值二百萬，位於廣州東山的千呎公寓。有指嫁胡漢清前，她曾要求經理人澄清關係，洗底嫁入胡家。

香港出名行頭窄，家長心目中子女可成功入大學讀「神科」，子女打機一向被視為「嘥時間」，但近年不少電競比賽獎金豐富，加上周邊商品長賣長有，市場龐大，「玩物喪志」早已過時。今年二十三歲的「機迷」譚兆泓（阿Q）早在中學時已看清即使能上大學，都是「打死一世工」的事實，立心自行創業，上年樹仁大學final year時，籌備開設網店HKQ gamers，決心在網上賣遊戲機及光碟。他先到腦場任職promoter，建立人際網絡，之後用兼職錢買遊戲光碟，邊玩邊「儲貨」，利用二手遊戲為自己的網店建立聲譽，之後更模仿「達哥」開台打機，多方面宣傳自己網店。現時網店開業快近一年，每月已吸引四千名熟客。其中特別版遊戲碟、遊戲周邊商品最賺錢。最厲害的是近日熱賣的任天堂遊戲機Switch，大鋪玩具反斗城推出後一個月都只能入五十多部，而阿Q早着先機，先行購入二十部吸客，成功為網店打響名堂。現時店鋪月賺三萬。收入不比專業人士差，但阿Q指收入多少並非最重要，最重要是天天能繼續打機：「唔好成日諗返office工，日做夜做搵得萬零兩萬蚊，先至無前途！」

訪問期間，阿Q應攝影師的要求「開台」打機拍攝，短短五分鐘，已吸引十多人同時觀看，更留言：「今日做乜咁早開台？」記者見他玩遊戲時十分投入，玩上難度較艱深的遊戲「仁王」時，不斷與觀眾討論「打佢啦」、「太耐無玩、唔記得啦」、「拎道具啦」。「打氣聲」此起彼落，攝影師表示拍攝已完成他亦不為所動，直至成功過關。「每晚俾個時間自己輕鬆吓，又可以介紹吓邊隻好玩，邊隻中伏就唔好買，睇我打機嘅人多數都係啲客。」他表示。

實體店炒價劣行創商機

阿Q直指，自己賣的遊戲不一定最平，「但肯定唔會要客食炒價」，他直指不少遊戲店經常坐地起價，辜負了一班game迷，不少都轉到他的店購買，「我係一出新game就即買嘅人，好似啲game一出，中午十二點，可能賣緊四百蚊，我食埋個飯都已經加廿蚊，一收工七點，又加多廿蚊。」據了解，不少實體店都見遊戲暢銷，就會不斷加價至斷貨，更甚者即使之前顧客已落訂，亦會用種種原因向他們「施壓」加價，心急玩遊戲的機迷亦無奈接受。內地人來港炒樓炒鋪風氣盛行，但阿Q直指，原來他們連遊戲光碟也一樣「狂掃」，助長炒風，「好多時啲鋪頭話無貨，其實留俾大陸人買，因為佢哋一買就買好多隻。」他解釋，由於中國對入口的遊戲內容有嚴格管制，「血腥少少都唔得」，加上不少中文版遊戲只限港台出售，造就他們來港掃貨。而遊戲光碟船期平均都要一個月時間，買不到就要等新貨或二手，令店鋪「長炒長有」。阿Q坦言，自己開店原則之一就是堅持不「炒價」，「講到明係幾多錢就幾多錢，跟番代理商都有建議零售價，一知道幾時出就開post問客要唔要，但係唔使俾訂金，有貨第一時間喺港鐵交收。」

避熱門商品減競爭

現時年輕人開網店，都是以賣食物、飾物、波鞋為主。不少人都以為現時手機遊戲盛行，加上網上娛樂眾多，賣遊戲機及光碟好似「out out哋」。阿Q則持相反意見，「以前細個玩PS2，都無錢打機，到依家搵到錢，加上翻版少咗好多，打開機嘅人都會肯俾錢。」他指現時客人主要是剛出來社會工作的年輕人及家長，男顧客佔九成，「好似我咁，玩開大作嘅手機game始終都滿足唔到，玩開嘅好難話唔玩就唔玩！」事實上，現時網店較少賣遊戲光碟，他面對的對手主要是信和、黃金等實體店。訪問期間正值平日上班時間，但阿Q電腦的WhatsApp響個不停，最少有十名客人同時訂貨，他表示現時平均每日都有五、六十單，最多近三百單，由於客量大，要聘請兩個員工專門回答顧客問題。送貨方面，他在facebook專頁會更新每日到各港鐵站的時間，亦會安排員工在港鐵站候命，方便客人隨時交收。顧客之一的CK就指：「本身自己想放game，IG掃掃吓就發現呢間，之後就開始買埋一份，呢度最好就係送到去最近的港鐵站，出去買來回車錢都要十幾廿蚊啦。」他指阿Q不時都會推優惠，「慳慳埋埋都食到餐飯。」

白做三個月建商譽

網店在上年六月開張，他自言開業成本全都是自己積蓄，唯一靠「父幹」的，就是將太子一個丟空的三百呎單位做倉，「我老豆做年宵，呢度都係用嚟放公仔，依家俾咗我用嚟放game同做直播，但最衰呢度部?成日壞，出入成日要行樓梯。」他一開始以二手game交易為主，他坦言頭兩個月幾乎「白做」，為的就是建立網店知名度。到了九月第一隻足球大作《FIFA17》，成功吸引大批客人，「我就搞買得多有優惠，好多人夾埋十一個成隊波咁買，加上嗰時啲客好心急，而我送到去港鐵站就有優勢。」阿Q坦言，開業頭兩個月因業務太繁忙，沒有時間打機，於是他決定「寓工作於打機」，在網上開台打機，順道宣傳自己網店。他坦言：「我每一隻game都知玩啲乜，個客問到好唔好玩都答到。」他續指，現時不少遊戲廠商都對不好玩的遊戲大事宣傳，令不少顧客不幸「中伏」，「開台就有呢樣好，等啲客睇過先買，就算訂咗見唔好玩想唔要，我都OK。」他指，若客人購買遊戲後不幸「卡關」，他亦樂意於WhatsApp進行協助。

「有咩工可以長期打機？」

不少機迷都慨嘆投身社會後，打機的時間少之又少，自言大學時經常通宵打機的阿Q就指：「唔好成日諗住返office工，我覺得無前途，搵得嗰萬零兩萬蚊就一世，咁搏一搏好過啦。」他指，由於現時訂貨及送貨都有員工幫忙，令他有更加充裕的時間打機，「試過做live，一打就打足兩日，凌晨四、五點俾觀眾叫醒。」他自豪地表示幾乎沒有其他職業可配合他的打機時間，「純粹為咗搵錢嘅，做金融嗰啲更加多，但唔係自己興趣。」至於未來目標，他卻堅持做網店，「其實依家打機嘅人差唔多都會上網，客源都夠，反而想規模再大啲，好似上次賣Nintendo Switch先入到二十部，規模再大啲可以入更加多貨，我都要同客講唔好意思。」

創業錦囊

開網店請老人有着數1. 不要吝嗇請員工，自己一腳踢，公司難以發展。2. 未來香港人口老化，加上長者搭港鐵有優惠，成為將來送貨員的一大趨勢。3. 若客人已落訂，必須如期發貨，「無貨無論點都要搵到有」。4. 顧客「轟炸式」message，都要盡快回覆，他解釋試過有些看似無聊的話題，最後可能是一筆大生意。

撰文：梁延宇攝影、攝錄：廖健昌[email protected]