|
||||||
|
聯繫匯率係特區 政府嘅聖牛，不能動搖，既然如此，我地講乜都冇用，九七之前，左丁山已主張脫鈎，依家一樣主張脫鈎，不過曾特首一日在位，一定冇得傾，且看下任特首嘅意願 如何。九七年金融風暴嘅後遺症係香港跌入downward spiral（下調旋渦），經歷六年通縮與高失業率，樓股大跌。○八年金融海嘯嘅後遺症係各國大印銀紙，尤其係美國，現時已有負利率、高通脹、樓股大升特 升嘅現象出現，此局面會持續起碼四年（○九至一二），直至美國經濟復甦，開始加息為止，專家估計美國要最快到咗二○一二年先至加息喎，故此著名投資作家對 左丁山講：「唔好咁快沽貨呀，沽咗買唔番！」股壇名嘴Ｗ問聽眾觀眾：「你地有冇嘢驚呀？」聽眾答：「有呀，驚買唔到貨！」有聯繫匯率呢個保護神坐鎮，保證 不加息，堅持負利率，港元與美元一齊下沉，難怪大家一齊跳舞。好似係○七年七月中啩，海嘯之前，花旗銀行總裁Prince對《金融時報》有一句名言：「音 樂仍未停，我地繼續跳舞！」呢位Prince先生就係咁跳舞變成跳樓，幾乎累死花旗銀行：（原文：But as long as the music is playing, you've got to get up and dance. We are still dancing）（上Google，打Chuck Prince Dancing，就有好多段稿講呢段──賓架逸事。） 一位讀者 Michael來電郵問，聯繫匯率脫鈎有人提，有沒有人提及將條「魚線」拉鬆？當然有啦，科大經濟學教授雷鼎鳴十一月十五日在《信報》發表文章，講熱錢流 入不難應付，講到一九六七年英鎊貶值前，就出現同樣問題，請Michael細讀，左丁山嘅學問差過雷教授好多皮，呢類問題最好問佢。 呢邊有 好多人繼續跳舞，嗰邊亦有人話要賣貨。大概越係老牌嘅投資者，就越係驚住音樂隨時停，新派投資者就認為有兩大因素唔准音樂停，其一係「直升機 伯」（Helicopter Ben）有佢主持聯儲局，美國會一路印銀紙，其二係香港聖牛唔郁得，話明跳舞，通宵達旦，直至情緒高漲到逼爆氣球為止。採中庸之道嘅馬主Ｋ就對左丁山講： 「我一於舊貨唔賣，新貨唔追！」冇貨呢？抵你眼紅兼寂寞！或者今個星期嚟講，中國盛傳加息，令股市大跌，會減少一啲眼紅症。 |
||||||