開海外公司，當然文件多多，信來信往，有時秘書做到火都嚟，巴拿馬文件衝擊各國政要，仲睇到香港兩大首富嘅秘書有幾巴辣。話說專幫人成立海外公司嘅Mossack律師行，要求誠哥再簽一次會議記錄，秘書以此回敬。 Mossack Fonseca律師行追四叔秘書攞認證護照影印本，四叔秘書則以此回應。 四叔秘書： 「李兆基博士係香港嘅公眾人物及非常有名，網站隨時都搵到佢張相，我哋認為可以豁免李兆基博士嘅認證護照影印本，如理解錯誤，煩請糾正我們。」 誠哥秘書：「我老細係香港嘅首富，唔係咁容易叫佢再簽過張會議記錄！」 註：資料根據國際調查記者同盟（ICIJ）向《壹週刊》、《明報》及「香港01」提供的「巴拿馬文件」。 局長夫人有用武之地 二○一三年離開大摩嘅陳家強局長夫人——胡翠萍Eva，早前join咗瑞士私人銀行瑞士寶盛Julius Baer；無獨有偶，局長夫人也有位同事，都係叫Eva Wu，所以夫人緊貼夫姓，在銀行內人稱呼佢Eva Chan，陳夫人當年離開大摩到Julius Baer，係經出身花旗和高盛的K哥（Kaven Leung）拉佢過檔，但投行生意淡薄，K哥雖貴為Julius Baer北亞洲嘅CEO，近排亦宣布榮休，咁跟隨K哥嘅陳夫人又如何呢？冇有怕，因為夫人任職大摩時，曾經替青年協會搞咗個「Eva」教室，親自向大學生教授求職信及履歷表撰寫技巧，今次大派用場也。 中環寸嘴：「乜乜春茶宴」延續「關鍵」精神 工廈大王楊耀松長子，游走高級酒店、銀行，及知名食肆，與各路人士打交道，自認有jet set生活方式，透過美酒佳餚，察看人生百態，把「生平絕學」不吐不快與粉絲分享。 春天到，天龍軒度咗個春茶宴幾有特色，正符合我延續「關鍵」精神，食得招積呀！味味餸都清清哋，最欣賞鐵觀音辣茶雞樅菌炒蟶子皇，鮮味出到嚟，唔係話吓吓豉椒炒嘛！唉，呢排社團就職禮多籮籮，劈咗幾晚酒火氣重，食食吓飯流鼻血，吖！天龍軒個David幾醒目，即刻同我焗壺菊花茶降吓火，仲醒幾支「有機」蜜糖俾我。嗱！呢啲咪五星級嘅招呼囉！唉，大陸土豪，唔單只搞亂地產市場，仲搞亂食肆市場。家陣喺New York食飯，15-20%貼士都唔夠，我啲老友告知最新情報係要30%，大陸佬唔識check單，英文又講唔掂，啲餐廳charge 30%都冇人challenge佢。嗰晚我學兄大佬馬墉傑Max Ma輕輕捐咗十皮嘢俾湯家驊嘅「民主思路」籌款首映，醒咗兩張飛我睇《美國飛人》首映，分咗Box 6同埋Box 7，有時間、有氣有力嘅就坐Box 7，好似我哋有水有權嘅咪同司長級坐Box 6，不過我同Max Ma坐嗰行都唔滿，睇嚟捐款都係有限數，其實橫掂都坐唔滿，點解又唔請埋傳媒去睇？ 香港麥當勞女人天下 三個女人不單只一個墟，仲係香港麥當勞管理特色，麥當勞香港都係女人揸旗，三名董事都係女人仔——張家茵（Phyllis）、周靈芝（Debbie）同黎韋詩（Randy），今次佢哋要換老闆，麥當勞二○一五年年報已暗示有意把業務賣盤，提到目標要把旗下特許經營分店比例由八成谷到九成半，其實香港嘅麥當勞已經係百分百由美國母公司直接經營，冇一間係特許經營。話說已故香港麥當勞之父伍日照，早於九六年將特許經營權賣番俾阿媽，香港二百四十間麥當勞，如連同物業一併出售，套現一大筆都咪話唔和味，以後再以特許經營模式，印印腳每年收番營業額百分之三至五專利收益，唔使冒風險都咪話唔爽。 | ||