2008-1-13 AD
退休 M請食飯，去萬邦行賽馬車會。呢個會所以前在威靈頓街雲咸街交界，印象中唔係咁旺，生意叫做 OK咁啦。點知舊年搬到萬邦行三、四樓之後，唔知係唔係位置極其方便，午飯晚飯旺到不得了，三樓日日常爆棚，訂唔到者請上四樓食港式西餐。前一次，大公司董事 L都訂唔到三樓，與左丁山坐四樓，呢層有一味港式西餐湯，就係「金必多湯」，十分令人懷舊。好多好多年前，雲咸街有一間「七重天」，就以「金必多湯」馳名遠近。後來灣仔華國飯店（現在變係一間會建築物）咖啡室亦靠「金必多湯」招徠。不飲此湯久矣，想唔到現在可以賽馬車會飲得番，至於味道咯喎，都係「七重天」好。
退休 M請食飯，在座者有女經紀 L，佢話佢二仔在港大畢業後，入一間投資銀行工作，做 IPO（新公司上市），日日不知放工時候，佢最近五個工作天都冇見過個仔，因為乖仔放工回家之時，佢已經上床（晚上十一時），第朝起身（七時許），乖仔又已經返工。雖然乖仔去年收花紅收到笑，但女經紀 L仍然為兒子健康擔心。
IPO如此興旺，邊個捨得唔做。新上市公司利潤好似幾好，可以吸引投資者申請新股。左丁山曾問過資深證券商 T：「老實講，好多年前一台灣民企、大陸民企盤數都係信唔過，真假難分。現在民企上市，是否可信？」證券商 T話：「時代變咯，民企老闆學精晒。以前未上市就賺大錢，上市就蝕本，唔想益投資者，其中一個主要理由就係透過 transfer pricing作怪。家掉轉頭，上市公司搶到美國大客訂單後，由同一老闆擁有私人公司供應原料或者做承造商，價錢特廉。結果係私人公司蝕大本，上市公司賺錢，業績亮麗，投資者高興，大行高興，推薦買入。」左丁山一時想唔通，再問：「咁做法，大老闆，即係上市公司大股東，咪好蝕底？」證券商 T話：「諗深一層就除笨有精啦。譬如私人公司蝕一億，讓上市公司賺一億。大老闆唔見一億啦，但佢佔上市公司六成股權，市盈率二十倍，上市公司市值增加二十億，大老闆身家增加番十二億，淨賺十一億，邊個笨呀！」