萬南 二五中環 私有化恒地？ 四叔梗No way!
1 :
GS(14)@2016-02-09 02:55:56http://www.metrohk.com.hk/index.php?cmd=detail&id=301916&search=1
呢排有大行出報告，吹四叔李兆基有機會私有化恒地(012)，消息一出即刻股價炒咗上去，但據經常喺大有錢佬身邊田田拍馬屁為生嘅人認為，寫呢份報告嘅分析員一係想搵個理由炒恒地上去，如果係咁就係醒目仔，否則佢只係讀死書計死數嘅人，完全唔明大孖沙嘅心態。
馬屁高手認為，四叔私有化恒地機會係零，因為呢間係佢嘅旗艦，冇咗市值過千億嘅公司，大孖沙會覺得好無面，更加有可能令到佢哋打唔入國際性嘅富豪榜。
話畀大家知，其實好多有錢佬好鍾意睇富豪榜，更會叫秘書儲起呢啲雜誌。馬屁高手仲話四叔就算想私有化，系內仲有大把公司畀佢㨂，總之一定唔係恒地，而呢一個邏輯，亦適用於其他大孖沙，「肯肯定」唔會搞旗艦公司。