編劇唔易做
編劇：＂老細，我諗到條開戲好橋！＂
＂講嚟聽吓。＂
＂嗱，而家三色台套‘張保仔’咁收得，我地一於打鐵趁熱，開番套元素既包含歷史、戰爭、武俠、愛情、奇幻、懸疑……總之乜九都有o既戲，人地講‘張保仔’，我地就講宋朝水滸一百零八好漢，一齊穿越嚟到現代……＂
老板不等編劇口水花噴完，已搖手打住，不客氣地：＂呢啲橋好似周街都係，有幾大新鮮感呀？同以前嗰啲陳年舊戲，好似咩‘城市劍客’呀‘急凍奇俠’呀咁，有咩分別？＂
編劇雖被潑了一盆冷水，但仍不氣餒，想了想，又道：＂咁唔啱開番套集驚慄、懸疑、推理、玄幻、鬥智、警匪題材於一身o既戲，我又有現成o既橋：‘一對孖生兄弟其中一個患上咗人格分裂症，但冇人知道究竟有人格分裂症o既係其中o既邊一個，就連有病嗰個自己都唔知！然後，有一晚，有人格分裂症嗰個竟然喺夢遊期間殺死咗佢o既親生阿媽，而後來佢先發現呢個死咗o既阿媽其實原來係自己一個失散咗十幾年o既女朋友o既前世穿越嚟咗現代……’＂
老板一聽，已不禁大皺眉頭：＂嘩，你仲有冇複撚雜啲呀？你搞到咁撚複雜，叫啲觀眾點撚樣睇得明呀？＂
編劇聞言，頓被打窒。
老板這才施施然道：＂一於咁啦，套戲就講，一對患有人格分裂症o既孖生兄弟，一齊穿越番咗宋朝，加入咗梁山泊，成為第一百零九同一百一十兩條好漢，然後因為一次意外，佢地同一百零八條好漢又一齊穿越咗去三國時代，於是佢地一齊幫助劉備打敗曹操，曹操得知真相後，深心不忿，於是千方百計派人穿越回現代，找來一支配備先進現代武器o既僱傭兵，點知呢隊僱傭兵o既首領喺穿越嚟到之後，居然分別同貂嬋、小喬一見鍾情，發展出一段三角戀，而另一方面，佢家族中o既一個親細佬為要謀奪佢o既家產同家族繼承權，亦追殺嚟到三國……再然後佢地就一齊發現咗外星人原來早喺三國時代已登陸地球，並且秘密化身成各個歷史人物……＂
編劇聽罷，不由為之一大怔：＂妖，你條橋咪仲複撚雜過我九倍？＂但表面不動聲色，呆了兩三秒之後，甚至隨即用力一拍大腿，肉麻地大叫起來：＂好橋！實在太好橋嘞！我敢話呢條橋一定work一定buy！老板你係得o既！＂