中環在線：富士康當黑印度200員工送院 李華華
|
|
台灣首富郭台銘（圖）近排黑仔到痹，唔通虎年犯太歲？幾個月前佢大陸嘅工廠不斷有員工跳樓自殺，搞到要搵人打齋，郭老仲親自走去深圳安撫員工，最後要全體大加薪，件事先叫做靜咗落嚟。點知……一波未平一波又起。
噚日輪到富士康集團喺印度欽奈（Chennai）間工廠出事嘞！話說嗰度發生有毒氣體洩漏，被勒令停工；據報有成200幾個員工出現嘔吐、呼吸困難等症狀，要送去醫院o忝！
富士康發言人梗係急急出嚟解畫啦！佢話欽奈廠係新廠，生產手機零組件為主，啟用前用過殺蟲煙劑，懷疑員工吸入殺蟲劑先搞到身體唔舒服。佢仲話多數員工已經出院返咗屋企，留院觀察嘅得28人，工廠仲會喺一個星期內復工。印度係佛國，唔知郭老今次會唔會去祈個福、求個平安呢？
李華華
|
| |
Next Page