📖 ZKIZ Archives

投資於行業暗淡時（四）- 百家雜評 止凡

來源: http://cpleung826.blogspot.hk/2015/10/blog-post_26.html

莎莎是一家本地零售股，要了解其業務，絕對不只看年報一個渠道，還可以做很多事情。而止凡就至少做過以下幾個動作，試圖找尋一些連基金大戶都沒有的資料及感覺，不要少看這些無聊動作，散戶的優勢正在於此。

身邊朋友：

 好像我這樣的男人，又怎會對這些賣化妝品的公司有所了解，但幸好我們身邊都總有女性朋友，所以我多會問問她們的意見。

 大體上，她們對莎莎的意見都相當正面，卓悅就好像雜亂一點，檔次又低一點，莎莎給人的感覺是較高級的，但產品又較貴。不過，幾位女性朋友都話就算貴一點也寧願到莎莎買，信心大一點，始終搽在自己塊面上的，還是穩陣一點較好，對假貨問題的擔心會少一點。
網上言論：

 SaSa vs 卓悅 vs colourmix，邊間比較好d？

 「我覺得colourmix好煩，係咁sale野」

 「係呀，我都覺得coluurmix d ba好煩，係咁跟住你，不停sell其他嘢」

 「比較鐘意sasa，不過朗豪對面個間有個staff成日黑口黑面。
卓記都ok，但d野就真係 .... 太過亂。
colourmix就 .... 無必要都唔想去 = =||」

 「sasa裝修都好d啦。卓悅成間雜貨店咁。sasa d裝修高檔d tim！」

 「sasa better because the shop is clean and tidy.
i do not like colormix, some BA is hard sell and not polite.」

 「鍾意去colourmix，會sell你買野
sasa行得舒服d
卓悅d野好亂，不過多d唔同ge品牌
（不過硬係覺得有部份係假野-v-好似olay個d，次次都賣到好平）」

 「OLAY其實間間都平架喇，not only卓悅..可能因為係made in china啦...」

 「鍾意去colourmix，但係d sale大部分都好煩 ~
不過知道佢地為左平時ge營業額先得煩到d客死，有d同情佢地 ~」

 「我覺得SASA好D....
買D野有信心D...
卓記D野好似過期咁.....又混亂...
COLOURMIX我唔去......
但係大家都有一個共通點....
就係D SALES姐姐勁厚粉.....厚都傻....」

 「SaSa最好！
卓悅成日賣假野 又有好多內地遊客
COLOURMIX 勁sale你野」
再看另一個討論區：

 我想問集團式既美容化妝店 - 卓悅，莎莎，Colourmix，其實邊間最好and最差？
可以論價錢，產品質素，檔次等等
我是用作研究之用...卻對此毫無認識....多謝解答~~~

 「本人覺得卓悅差d...
因為聽人講過大減價其實係會賣d過期既野比人.....」

 「colourmix 係咪最 high class ga？」

 「下乜唔係sasa差d咩,,,好似登報話賣過期野..
colourmix？未聽過..邊度？
我成日都入去睇野,,,就算唔買都走入去睇餐飽,,,um..其實唔知點解去li d make up/skin care shop前面就好想入去睇架la~~@_@？
其實佢地係水貨o者,,冇保證eg.過期....if要買時自己小心d la~
不過成日都見到好多女人係果到買野架la~~if真係咁差既話,,,又唔見行街時香港d女人爛哂面...」

 「聽我個fd講過卓越有d貨有號碼係睇日期嫁，其實我都係聽姐」

 「上次我去卓越買野，佢sell我一樣野
由3xx減到138，咁佢都有比我試用
好似唔錯嘛，咁咪買囉，重話係法國野，我又趕住用，咁咪買囉
點知返到家，比我唔小心望到
佢已過了期成1年3個月，頂！
都係自己唔小心，不過冇諗到會發生d咁既事嘛」

 「我上次去買lanegie的時候又ok wor。
我買的時候叫佢比個日期我睇。
我睇到支野出廠1個月都冇，好新鮮，哈哈。」

 「我上次去卓越買左樽Clinique既surge moisture（唔記得點串）
點知我上去Clinique個website竟然無果隻product！
嚇到我死死下..跟住個friend話可能係舊product都未定，跟住減價囉出黎賣。
佢做完promotion之後，真係無左隻product，但舊product都唔知擺左幾耐。
之後我去clinique果道試下隻差唔多樣既product係唔係咁既質地，都似8成既。
我屋企哥樽查落手又滑滑，又無異味咪算囉。
下次真係要小心睇真d，佢又無貼住expired date。」

 「係有呢隻野ga，叫moisture surge extra係粉紅色ga ma。」

 「聽我個fd講過卓越有d貨有號碼係睇日期號碼係睇日期嫁，其實我都係聽姐。
d號碼點睇ga？」

 「我都唔清楚。
不過我家姐識睇莎莎d碼
好似u係未過期既」
blog友Allison在巴黎兄文章處留言看到：

 第一次留言，因為我都觀察左莎莎一段時間，之前佔中果排已經心郁郁，原因如下：

 1. 個人能力圈。我係投資初哥，睇開的幾位blogger都建議要從自身能力圈入手，扮靚shopping係其中一項，亦都經常會行幾間龍頭藥妝店，加上以前暑期工做過其「對手公司」，叫做有丁咁多行內資訊（雖然係幾年前）

 2. 年報內容。見到公司管理層非常有HEART，分析全面，而且列出相應「具體」的對策，而非好似對手公司咁講D空泛野、交「行貨」或者跟人口水尾。

 3. 電子商貿。零售長遠發展一定要發展埋電子商貿，同埋online marketing，已經係大勢所趨。13-14年報入面，其中一樣野令我非常impressive，就係佢地提到，會加入一樣「追蹤使用者愛好」的功能，我好鐘意網購，尤其淘寶，淘寶之所以令人流連忘返，其中一招好厲害，就係佢就追蹤你睇緊乜，不斷suggest一D類似的商品，你就睇極都睇唔完，愈買愈多（當然淘寶仲有好多好厲害招數，唔只呢樣）。要做內地人生意，能夠做到D同淘寶類似的野，its good！

 另外，14-15年報入面見到莎莎係電子商貿方面又有新玩意，就係搞左IPAD APP。話要發展電子商貿，講得出，做得到，而且不斷見到有進展，做的動作都好正路。

 SASA.COM的內地版，個版面整到同淘寶非常似，支付方式有足夠的「在地化」，例如支付寶、微訊支付、財付通，內地消費者用起泥會非常易上手。免運費門檻只係二百幾蚊，比對手公司低。

 本地ONLINE MARKETING方面，SASA同一D受歡迎的BEAUTY BLOGGER合作賣廣告、搞活動。呢D都係對手公司做唔到/冇去做的野。而家D年輕人，睇手機、YOUTUBE多過睇電視。

 4. 比較對手公司，其中一間，當年係入面工作，感覺唔好，佢地揀泥代理果D品牌有D其實幾好用，但公司對員工刻薄，底薪非常低，做唔到數就罰企，人手唔夠，D 員工可以連踩21日都無假放，唔會留得住人才，員工欠缺training，因人手唔夠根本無時間train，好多野亂咁泥。開新舖好似週圍亂插旗咁，SASA撒離的舖位佢就搬入去。（平時成日行，剛好留意到）

 5. 另一間對手公司，個年報已睇到眼都花，只見不斷玩弄財技，做D睇唔明的動作。4億買幢野返泥做寫字樓+倉庫，話自用可以每年省千萬租金同每季幾百萬裝修費，4億咪姐係40年租金？寫字樓同倉庫要每季裝修架咩？真係好難明。發展業務篇幅就寫D空泛野，來來去去都係果D。仲有，全線店面門口的主題顏色改做黑色，整D彩虹字，老土又核突。

 但由佔中至今仲未買入係因為以下幾點：

 1. 個價可以低D（因佔中，以及人們愈來愈睇淡自由行，零售股會普遍不被看好）。
2. 儘管已經算係抵買，但手上資金不多，剛出來工作人工唔多，兩手已經過萬，儲落的錢買左其他股，仲有其他心水零售股想買，要觀望及取捨。
3. 觀察年報入面講的策略係咪講得出做得到。


另外，早前的文章就有不少blog友對莎莎印象不太好：

 Kit：

 不過坦白說，作為女生，真的很少去莎莎買野，大牌子會去專櫃買，細牌子會去卓悅（因為同一產品卓悅較平）。莎莎好像主要的顧客都是自由行。。所以當我自己和身邊的朋友都不經常光顧，我對這股票也有保留。
Taktak：

 本人不太明白SASA的品牌價值同收入還有那麼高？因眼見有些好用牌字的商品SASA又無得買，而相同產品Colourmix（威高國際）更平。此外我的朋友都覺SASA變得太大陸化（如翠華一樣），所以不太多去。現在當我要買禮物，都不會去SASA，大商場專門店經常有折（而且同人講專門店買，感覺良好些，你懂的）。
完全明白SASA同翠華一樣，在國內人心中還有些位置，但事實好多人來了香港幾次就知那裡有更好更便的買（如尖沙咀某藥房）。與翠華一樣，以前經常排長龍等位，現在？
所以莎莎、翠華業績倒退是不無道理的，眼看Colourmix做得不差、商場專門店及個體戶仍有不少人買東西、荃灣佐敦某些出名餐廳依然日日排隊，零售業寒冬是太過依賴、太過單一、太過不思安危自食的惡果。希望其有所改變，不然只像初初Berkshire般，只能疑似有價值的東西，股神亦見無奈。
Hana：

 作為一個用家和兼職代購買手，我覺得莎莎會係翻版的思捷，事關我已經有N年冇去過莎莎買野了。上個月招呼咗一班上海的80後中產女仔陪佢哋買彩妝同護膚品，大約消費咗8萬蚊港紙，冇一蚊係使係莎莎度嘅。

 大牌係專櫃／專門店買，因為全部牌子常年都有買滿幾多錢送贈品，而d贈品價值不菲，攞去旅行用又好方便。會員仲可以儲分換產品，定時定候又有試用裝送。送畀人嗰啲日丶韓護膚品就去Colourmix或藥房買，因為又平又多選擇。仲有依加萬寧和屈辰氏有好多開架藥妝賣又搶咗好多市場佔有率。小女子認為全世界大約只有通勝係可以一本書睇到老嘅，變幻原是永恆。
親身視察：

 看過以上的文字，有好有壞，大約對這個行業內不同的公司心中有個譜。我平日逛商場時，也會留意這些店舖。大體上，感覺跟以上部份討論都差不多，莎莎較企理，有一種較專業的感覺。而卓悅就越來越走自由行（水貨客）路線，店內的確較雜亂，更有尿片及日用品發售，水貨客都在門口地上整理一箱二箱的貨物，使本地客的消費意欲大減。而colourmix就客流很少，個人來說，對莎莎的整體感覺頗不錯。
後記：

 可能你會話，不是吧，就看看這些討論區就投資，這你也相信？會否不太科學呢？投資是藝術而非科學，了解一家公司就要從多方面去了解。年報看過了，分析過了，這是基礎，是否足夠呢？足夠不足夠這個問題，永遠都是沒有最好，只有更好。

 太太們在買菜之前，如何知道這顆菜值多少？靚不靚？是否看年報？有的話可以吧，親身檢查其進口過程，可以的話無妨。最簡單直接是口碑，問問其他太太，管理自己的經驗，很快就對要買的菜有個出色的決定。

 說了很多篇，正如第一篇所言，以前有不少寫個股估值的文章都有談論不同的方法，不同的分析思考角度，今次這個方法也是我常用的。我研究過的公司，多能說出它的故事，大故事及小故事也會說一點點，因為我會從不同渠道去找資料，尤其今天有google，資訊不難找，我相信基金大戶多不會做這些事情，大家不妨試試看。

 最後總結一下，這幾篇文章一口氣說了不少估值的方法點子，亦引起不少討論，看來大家都把這樣一家公司的前世今生都拿出來深思細想一番，投資與否，也總算有個了解。始終用文字交代有限制，投資者不妨拿這些文章作為起始點，繼續努力鑽研，祝大家成功。
PermaLink: https://articles.zkiz.com/?id=167196
Next Page
ZKIZ Archives @ 2019