| ||||||
| 讀者來電郵問： 「以前提過之中環免費驗乙型肝炎的詳細地址」。翻查舊稿，本欄在二月六日寫過，免費乙型肝炎檢驗中心嘅地址係：吉士笠街十一號地下，位於威靈頓街與結志街 之間，開放時間係平日早上十時至下午五時，星期六自中午十二時至下午三時。 上到陸羽飲茶，餐廳R不在，餐飲M話R先生與同事去咗意大利視察 紅白酒，應一間大啤酒廠之邀，視察後特登自意大利去咗英國曼徹斯特睇打吡大戰（四月十七日），曼城對曼聯，睇完之後返到倫敦，所有飛機已經因為冰島火山灰 已停航，冇法啦，餐廳R被逼滯留倫敦，住酒店住多一個星期，呢場波睇得貴咯。入場票就係啤酒廠送嘅，點估到睇完場波要付上比波飛昂貴好多倍嘅費用吖。國際 航空運輸協會IATA披露，停航事件令全球航空業每日損失二億美元；亞太空運中心CAPA指「火山灰襲擊」已令航空業損失二十億美元（至四月十八日），咁 講法，「火山灰」對航空業嘅打擊，慘情過九一一，餐廳R在英國睇波付出之額外費用，相比之下，只算九牛一毛，不過呢條毛係佢一個人負擔嘅，咪話唔肉痛。 因 火山灰而導致之損失，應該由邊個負責？航空公司（特別係歐洲嘅公司）鬼殺咁嘈，但各國政府之負債比率高，為咗希臘債務危機大傷腦筋，邊度願意賠償、或補 償、或補貼歐洲航空業吖，唔搭飛機之納稅人亦會反對，故此各方面嘅損失問題一定係嘈完之後，就不了了之，以後有歐洲航空公司破產或被逼與對手合併，一啲都 唔奇。 希臘債務危機有幾深？據天真許傳來電郵，引用www.moneyandmarkets.com嘅三月廿四日資料，希臘在2010年政 府負債佔GDP嘅百分比（估計）係124.9%，財赤佔GDP 12.2%（按：歐盟已修訂之為13.6%），其他國家亦唔好得去邊，全部超過歐盟自訂之理財指引，即財赤不可高於GDP之3%，國家負債總額不可高於 GDP 60%。譬如歐盟經濟最好嘅國家，2010年德國嘅負債佔GDP 77%，財赤佔GDP 6%，我哋亞洲嘅日本，負債佔GDP 196.4%，財赤佔GDP 8.9%，歐盟自訂之公共理財指引，形同虛設，個個先使未來錢，故此久唔久就會來一次金融爆煲，人為破壞性遠高於冰島火山，天災之為害，那及人禍！ | ||||||