ZKIZ Archives

上流社會無法上流 佟 若喬

來源: http://hkcitizensmedia.com/2015/03/03/%E4%B8%8A%E6%B5%81%E7%A4%BE%E6%9C%83%E7%84%A1%E6%B3%95%E4%B8%8A%E6%B5%81/

財爺呢頭話自己衫袖裡面仲有好多招，個頭金管局就出招收緊按揭成數。但呢項「辣招」令原本打算上車的人都疊埋心水轉去租樓，變相進一步推高租金；二手樓樓按收緊，但發展商照樣可以向買家提供二按，咁即是發展商一手樓可以繼續暢銷。難怪幾個Whatsapp groups中的朋友個個都叫苦連天，快要拉埋天窗的姐妹慨嘆要捱貴租，不如瞓街拎綜緩，起碼出三糧，不用做樓奴。又有姐妹話，現在要上車，就算靠屋企人有筆首期都無用，因為單靠自己的人工，供款與入息比率都超過四成半。Pringles財爺無情一句：「無錢就唔好買樓。」真是喊濕幾個枕頭都無用。

正如小妹之前所講，呢個社會太缺乏向上流的機會，要上樓、要進修都唔係話咁易。有人將呢個矛盾講成「世代之爭」，其實不無道理。

就好似上星期財經界另一焦點，長和系合併前最後一次股東大會，年屆87歲的李超人首次提及交棒時間表，就是要等長和系再上一個新臺階，此後自己或者退任做公司的特別顧問，在重要投資計劃給予意見。未知坐在旁邊的Victor聽到超人咁講，有何感受呢？其實，李澤鉅都50歲，入長實28年，仍然擔任李嘉誠的副手。超人明言現時未有退休計劃，到底他口中的「新臺階」是什麼呢？沒有交代清楚，但肯定的是，就算他日超人真的退下來，亦只會退而不休，仍然要做公司的「特別顧問」，即係繼續「垂簾聽政」，就好似國家主席退任之後，都未全身而退，黨軍政實力兼影響力猶在。對於富二代來說，他們要進一步向上流，真正當家作主一樣難。

要白手興家的大孖沙放心退下來交棒，富二代跟我們期盼樓價回落一樣，只有「癡癡的等」。四叔一樣年屆86歲，上年退任美麗華主席，交俾44歲的細仔李家誠做主席。但市場更關心的是恒地系幾時交棒呢？老人家話，重要的業務未會退任，現在還會日日番工。其實，可能不是老人家戀棧不願退，而是不能退。李超人和四叔無可否認已成為公司，甚至是上一代香港人的icons，是「精神領袖」，所以他們都不會輕言退休，怕影響投資者信心。

不過，世代更替本來就是平常不過的事，最緊要是交接順利。另一個家族上市王國新地，經歷貪汙事件之後，雖然對企業管治帶來負面影響，但並非不無好處。起碼，第三代繼承人、郭炳江之子郭基煇(Adam)由父親被判罪成一刻開始，便正式登場了。上星期還第一次陪同叔叔郭炳聯、以執董身份出席新地股東會。30有1的Adam出身名牌大學，讀過史丹福、哈佛，做過投行，profile夠哂靚仔，只是過往一直備受高度保護，低調排在長輩之後。養兵千日，三十而立的Adam臨危受命代父從軍擔大旗，AGM對傳媒對答有條不紊，而且不卑不亢，表現實在抵讚。Adam周不時到監獄，探望爸爸之後接受訪問，鏡頭前的乖仔形象夠入屋。雖然61歲的叔父炳聯話明一人擔正，暫時未退，但假以時日，相信Adam上步之路已經鋪好。

但講到最「幸運」的，可能是姐妹們最虎視眈眈的大隻仔的會德豐主席吳宗權。69歲的父親吳光正上個月中宣佈將於五月退任，Douglas以36歲之妙齡全面接掌九倉、會德豐王國。雖然有吳天海，梁誌堅等老臣子扶助，但分析依然質疑接班時機，指吳光正或「另有要事」，九倉公司股價近期都要偏軟。

與宗權BB同樣是八十後，已一躍成為上市王國話事人，關鍵在於父親「肯放手」。新世界星期一宣佈，鄭裕彤之長孫，被譽為新世界終極接班人、現年35歲的鄭誌剛將升呢由執行董事兼聯席總經理，改任為執行副主席兼聯席總經理，為進一步交棒鋪路。相信純官深明下一代想接棒的希望有多大，因為鄭家純1973年已經出任新世界執行董事，但一直等到2011年、即周大福上市前夕，才由原本的副主席升任為主席及執行董事。(當然他早年投資失利，令彤叔不得不再次出山)所謂己所不欲，勿施於人，相信他也不想兒子經歷自己當年邁長的等待。

可能你會話富二代的世界距離你很遠，他們「成功需父幹」。你沒有有錢老豆，靠自己連車都上不到。但一個社會，上一代不肯放手，下一代沒空間向上流，也許就只有落得原地踏步的下場。