ZKIZ Archives


利蘊珍籌款挑戰健力士紀錄

2014-09-04  NM
 
 

 

利希慎孫女、TVB創辦人利孝和的女兒利蘊珍,三年前頂住四十多度高溫,用三日時間踩越野單車,由伊朗穿越絲綢之路到新疆喀什,為她創立的「運動燃希望基金」籌款。事隔三年,她又有新搞作。十一月中,她會在香港體育學院舉行大型網球嘉年華會,活動除挑戰「網球單打最多連續對手」的健力士世界紀錄外,還會邀請世界級網球手來參與,利蘊珍坦言:「三年前去黃沙萬里踩單車,三年後,基金都用得七七八八,依家做緊三大project會繼續維持,跟住我哋會有兩間新學校已經喺度籌備緊,基金目的係幫經濟上有需要的青少年做運動,變咗我今年要籌款,依家搵到一個幾好玩、大家又可以參與的活動。」一齊出心

利蘊珍(Marie)會在晨早練波,問她是否想避過最猛烈的陽光?她笑笑口說:「我唔怕曬,但我早睡早起,十一點前就瞓,由細到大都係咁,讀書都一早起身讀。」 今次作為基金第二輪籌款,Marie鬼馬地說:「我哋揀啲好玩嘢啦,今次唔只係挑戰健力士,我哋會做到似一個嘉年華,會set up十幾隻game booth,有晏食、有茶點,唔係淨係鍾意運動先嚟得,一家大細都可以嚟參與。」同時世界級網球手也來打氣,包括世界級中國女網球手,及曾在男網世界排名第九的高手也來參與,但Marie賣關子說:「名字唔透露住,俾個surprise大家。」她說到時鍾意打網球的名人、明星亦會來,還會有一些網球技術改良班等包羅萬有的活動,「唔係只係我孤孤單單去silk road踩單車,今次係開放俾差唔多全香港,我甚至想去到白領嗰個階層,今次不單只可以捐錢入嚟打健力士,你就算捐幾百蚊都可入嚟參與第二啲項目。」最緊張刺激的,是他們今次想破去年英國球手Thomas Allard連續與廿八名對手完成比賽的健力士世界紀錄。今次來港四年的法國職業網球手Jérôme Lacorte將接受考驗,Jérôme要和不少於三十個對手、作出最少六十局對戰的單打比賽,預算會打超過三十小時。問Marie會落場打幾多局?她說:「我起碼打一個slot,其他睇爭唔爭到位,如果其他人爭打世界級就讓佢哋打,我最主要俾有心人參與,我亦唔例外一定捐贈去呢個基金,所以我都會打。」但中途Jérôme食飯和人有三急怎算?「佢差唔多總共有兩小時休息。」Marie第一次籌到八百萬,今次會否想突破以前以籌得千萬為目標?「你知我想愈多愈好,但數目唔係最主要,見到好多人好support我呢個event,捐幾多其實我都會欣賞和感謝佢哋。」

天天運動

為應付網球賽,Marie近日亦練多了網球,又做其他帶氧運動如打boxing、跑步和做gym練臂力,「要配合依家做啲咩,我就做啲乜運動。我都鍾意游水,游水用到全身肌肉,但游水和網球有少少衝突,游完水手腳會變咗軟啲,打網球手腳要靈活,所以唔係咁配合。」Marie真的很鍾情運動,她說:「做運動好舒服,諗嘢都快啲。個人積極、正面,無嘢有困難。」正如訪問當日下着大雨,Marie堅持到網球場,一停雨她便即刻落場,「落微雨都可以照打,睇場地係咩material;做運動係要跳出comfort zone,落雨你都可以出去跑,行雷閃電就唔好。」她甚至會朝早和下午各做一項運動,「又出咗汗一小時,再做埋當日要做嘅事,夜晚便可以spend時間給屋企人。」除母親利孝和夫人外,他們全家人也喜歡網球,這和她兒時在中半山的堅尼地道舊居長大有關,「網球係我最先玩,因為我好lucky,屋企自己有個網球場。」但Marie就坦言不大喜歡跑步,「跑步悶咗少少,我鍾意同人傾偈交流。」Marie笑着說。

活動資料

日期:十一月十五日及十六日地點:香港體育學院參加辦法請參閱運動燃希望基金網址http://www.sportsforhopefoundation.org.hk

 
PermaLink: https://articles.zkiz.com/?id=111043

Next Page

ZKIZ Archives @ 2019