ZKIZ Archives


許家印住300呎開始

2014-09-04  NM
 
 

 

曾傳過被大陸限制出境嘅恒大地產(3333)主席許家印,上星期現身恒大業績發布會,話除咗搞地產、足球、礦泉水外,未來仲要搞糧油、乳業同畜牧業,明年仲要躋身世界五百強!係咪齋吹水?小宗真係要放長雙眼睇,但佢一向「估你唔到」就好可以肯定。

小宗睇過土地註冊處記錄,許家印喺香港留低嘅第一條腳毛,係九九年响佐敦買咗層樓。呢層位於柯士甸道嘅單幢樓祥景樓,對正佐敦木球會,景觀唔錯,但建築面積只有五百呎,實用面積更加只有三百幾呎,同大家住緊嘅蝸居一樣。當時買入價一百七十五萬,現市值五百萬唔夠,許家印至今仲揸喺手。佢最神乎其技係,跟住十年無買過嘢,○九年就向新世界買入山頂布力徑十號其中一間獨立屋,市傳成交價達四億半!今年只有五十六歲嘅許家印,家鄉喺河南,曾經同阿嫲住農村,做過擔屎工。佢九六年喺內地成立恒大地產,之後來香港,攞香港身份證,喺香港上市,再住埋香港頂級豪宅;咁神乎其技,點到你唔服?

中環寸嘴:食住個好位

我識食兼「惜」食,喺酒樓餐廳食剩餸菜一定打包,湯渣照打包,加水煲多次仲有味,留番星期六、日屋企食,好過叫賓妹買餸打斧頭。咁唔係孤寒,係我工廈小王子深明好多嘢得來不易,要有衣食。有時食,都唔係為填飽個肚,而係想坐喺風水靚位,吸收吓旺氣、財氣。聽人講四季酒店間中菜——龍景軒的VIP房是全酒店最佳風水之處,今個禮拜搞搞新意思,請咗位風水阿姐——七仙羽食飯,睇吓佢有冇料到,有冇火花擦得出。

呢間VIP房最低消費一皮嘢,所以唔柯打兩支酒唔得,再整隻燒豬、必食嘅鮑魚酥,呢期子薑靚,整味子薑爆田雞……今鋪食係次要,先考吓呢位七姐有冇料到先。

呢位七姐話四季酒店屬土,所以裝修好多灰灰黑黑嘅用料,夠晒多水局,風水好好。佢仲話四叔(李兆基)迷信,酒店風水局實好。咁咪露底囉,四叔只管apartment同商場,係國金軒嗰邊o架,餐廳及酒店歸新地管噃!咁點先知間餐廳夾唔夾我呢?七姐話睇命格。我就話,好簡單,入到間餐廳,收嘅電話報喜定報憂多啲先,咁就知夾唔夾。唔係我朝朝早去四季間coffee shop食早餐囉喎,梗係索吓啲旺氣,頭腦醒扒啲。

咁又坐邊個位好?呢位七姐話搵個背山位坐,有靠山。我就話最緊要坐正,唔坐歪,做阿二咩!仲有,食飯好、揼骨好,唔好去啲暗暗黑黑嘅地方,尤其係地庫嗰啲,走勢向下。塵歸塵、土歸土咩!七姐無乜精警嘢講到,雖然佢話唔收費,不過我楊公子老豆教落,便宜莫貪,係咁意都封番封利是。富豪飯局完結,離開四季酒店上車之際,眼眉「戚」咗十幾下,財運到也,喺股市執咗幾廿個咁啦,呢餐飯食得過!

許浩明壯年早逝

同許家印一樣五十六歲嘅許浩明(Herbert),就無咁好彩。許浩明於上週六突然逝世,外界只知死因與肺功能問題有關。小宗聽Herbert老友講係肺癌,雖然肺癌同吸煙幾乎畫上等號,但據講Herbert並無吸煙壞習慣,相當不幸。Herbert擁美國哈姆斯頓大學哲學榮譽博士及香港大學法律學士,曾任職聯交所,離開後先後出任粵海投資(270)、新意網(8008)及海域集團(1220,現稱志道國際)等高層,佢曾講過海域資金不翼而飛面臨清盤,多名股東遭起訴,係佢人生「最黑暗的日子」。Herbert對上一次公開露面,已係四月出席中信21世紀(241)股東會,五月辭職。他生前熱愛賽馬,旗下七馬匹,六匹都係「甜」字開頭,包括「甜少」、「甜甜蜜蜜」、「甜絲絲」、「甜蜜至至上」、「甜情蜜意」,以及仍然服役的「甜城效應」,願Herbert一路好走。

兄弟同「錢」有緣

上星期一,華僑同永亨一齊賣咗個全版廣告,提醒大家下個月開始,永亨銀行就正式改名為華僑永亨銀行。當日廣告下款,星洲華僑銀行集團嘅行政總裁錢乃驥,有份簽名。錢乃驥幫坡佬做嘢,佢阿哥錢乃駿亦唔少嘢;兩兄弟同樣有來頭,一門雙傑。來自上海嘅錢乃驥(Samuel),七十年代於九龍華仁畢業,跟手到美國洛杉磯讀經濟,回港加入美銀由行政人員見習生做起,九十年代中期已係美銀亞洲CEO。錢乃駿(James)仲巴閉,當年留港攻讀浸會書院工管系,之後加入銀行界,九十年代在花旗紐約總行任高職,九四年轉投誠哥麾下,出任香港國際貨櫃碼頭(HIT)財務總經理,如今已是HIT控股公司和記黃埔港口集團執董兼財務總監,仲睇埋集團旗下所有中國企業。當年James的同期校友,仲有樓神趙國雄,同新鴻基金融CEO梁永祥。回首那個年代,香港人才濟濟,仲對外輸出,不用外求!

金牙大狀講嘢

讓亞視永成追憶通訊局行將發落無綫、亞視有冇得續牌。亞視發聲明話香港不能冇亞視,其執行董事葉家寶則話亞視係香港人嘅「集體回憶」,而未來六年亞視將落重本投資二十七億元,一兩年內有望收支平衡云云。香港不能冇亞視?做過公投,問過香港人咩?就算唔使公投,香港人早已㩒掣表態,收視率顯示冇亞視絕對冇問題噃。再者,即使亞視真係「集體回憶」嘅一部分,但咁就可以留低啦咩?契媽英女皇何嘗唔係香港人嘅「集體回憶」,又唔見佢留得低?今時今日搞鋪公投吖,絕大多數香港人肯定覺得完全絕對唔可以冇咗契媽。亞視一兩年間收支平衡?講吖?除咗邱德根,試問乜誰有呢個本事先?古往今來,世間上只有一個邱德根。除非佢老人家肯出山,否則乜都假。舊的不走、新的不來,就讓亞視永成追憶吧!

PermaLink: https://articles.zkiz.com/?id=110749

Next Page

ZKIZ Archives @ 2019