ZKIZ Archives


《中佬手記》史詩大戰扣人心弦,德國封王團隊稱霸 得個跑字

http://solelyrun.blogspot.hk/2014/07/blog-post_7451.html
24 年。一個奇妙嘅數字,繼巴西與意大利喺相隔 24 年後第四度成為世界盃冠軍,德國喺 2014 年,成為第三支四屆世界盃盟主,亦成為首支喺美洲高舉世界盃嘅歐洲球隊。 36 歲嘅高路斯今屆打破朗拿度保持嘅世界盃最高入球紀錄,四度參賽而最終得到球壇最高榮譽,躋身球壇傳奇行列。但更重要嘅,係德國團隊眾志成城,後備上陣嘅舒爾尼同葛斯貢獻唯一一個入球,印證當代足球係團體運動,而唔係單憑個人技術取勝。

英文有句諺語:  "If it is not broken, don't fix it." 開波前一個鐘睇出場陣容同準決賽一模一樣,都知德國同阿根廷嘅兩位教練路維同沙比拿相當滿意球隊嘅表現,唔打算喺重要關頭作出調動。不過,人算不如天算,德國防中基迪拉熱身時受傷,要由克拉馬取代。即使話德國係踢整體都好,但冇咁個正選防中,始終會削弱咗防守能力同進攻嘅變化。尤其是,當對面有美斯嘅時候。
阿根廷有美斯,原先以為會用佢做 4-2-3-1 嘅進攻中場角色,但嚟到決賽,陣式更加傾向 4-4-2 ,美斯同希古恩聯手攻堅,角色更似 90 年代意大利名宿巴治奧嘅「 9 號半」。當然,阿根廷有兩位效率高嘅防守中場馬斯查蘭奴同碧利亞,防線絕對有足夠嘅屏障。

接戰之後,德國明顯佔有較多控球優勢,但阿根廷防守既深且密,時刻有八個球員包圍禁區,無論高路斯定湯馬士梅拿都難越雷池。由於美斯專門強攻德國左路,高大但轉身慢嘅賀維迪斯備受威脅,奧斯爾要頻頻回防助守,變相令德國左路攻勢薄弱,只能側重右邊嘅拿姆助攻。

更不幸嘅係,臨危受命嘅克拉馬喺一次爭波當中,畀從後殺到嘅加雷用膊頭撞頭,踢咗半個鐘左右就要退下火線。路維喺防中兵源將盡之下,起用攻擊火力更強嘅舒爾尼,一來壓制薩巴列達同拿維斯,唔畀佢哋從容助攻 ,二來將策劃能力較強嘅卻奧斯拉後拍返舒韋恩史迪加,等「小豬」可以專注防守。

講開卻奧斯,佢幾乎犯咗一個大衛雷斯喺季軍戰所犯嘅錯誤:頭槌將個波送去禁區頂,分別在於今次卻奧斯係中場回後迎頂去無人地帶,希古恩一聲唔該就單刀埋門,可惜面對紐亞個波射到離行離列,絕對大嘥。希古恩之後再有另一次機會,接應今場表現活躍嘅拿維斯右路傳中近門抽入,不過因為旁證示意越位而食詐糊。阿根廷之後再有另一次反擊機會,拿維斯走到門前接應但係畀謝路美保定解圍。

德國後防喺今屆賽事都未試過咁樣風聲鶴唳,前面亦尷尬地被迫重複地喺右路斬中,最有威脅嘅埋門,計有舒爾尼後上撞射被羅美路當出、奧斯爾靚轉身餵畀卻奧斯禁區頂施射但太正被接到實一實;以及右路角球,賀維迪斯飛身迎頂中近柱。半場雙方互無紀錄,表面上德國攻勢較多,但論入肉,其實阿根廷更似會入波嘅一隊。美斯掂波唔多,但質素取勝。唯一嘅疑問,係阿根廷上場同荷蘭血戰 120 分鐘,下半場會唔會體力下降。

阿根廷下半場換入阿古路,換出拿維斯,索性變陣踢 4-3-3 ,有少少令 R 頭。拿維斯上半場段段放段段有,搞到賀維迪斯甩轆咁滯。放阿古路入嚟喺中間竄擾,無錯係可以扯開多啲空間美斯做英雄,但佢哋兩個真係各自為政,連帶希古恩都靜埋--除咗下半場初段成隊波一齊壓上,趁德國未企穩陣腳搞到一陣混亂。美斯喺左邊射地波僅僅斜出,已經係下半場寥寥可數嘅埋門機會。

德國回一回魂之後又攞返主導權,但阿根廷防守的確專注而緊密,冇返咁上下心思,結局就只會係高路斯畀兩個後衛夾擊之下夾硬頂中目標但冇威脅。戰情喺中後段陷入膠著,阿根廷球員踢落有啲躁,薩巴列達同阿古路先後因為過火攔截而領黃牌。美斯下半場又開著慳電模式,連扭腳波都畀對手單對單封殺到,似乎佢老豆賽前話「美斯其實攰到謝曬皮」所言非虛。

阿根廷第二個換人名額畀咗柏拿斯奧,入替屢失戎機嘅希古恩。「敗家」似乎同希古恩嘅國家隊生涯緊緊相連。與此同時,阿根廷後防線喺 75 分鐘打後出現體力下降嘅現象,德國落底線同喺中間造入去嘅空間都逐漸多咗。如果唔係卻奧斯又一次浪費禁區頂遠射嘅機會,德國早已勝券在握。

臨完 90 分鐘前,雙方分別換入加高同葛斯,入替安素佩雷斯同高路斯。德國擺返湯馬士梅拿上最前踢 False-9 ,畀葛斯喺邊線衝鋒。不過換人都無阻世界盃連續三屆決賽要打加時嘅事實。一出返嚟,舒爾尼同葛斯喺左邊一次撞牆,舒爾尼近門逗射可惜角度畀羅美路封晒。阿根廷亦有一次機會,可惜柏拿斯奧未能把握侯姆斯失誤,心口控落嚟 ball out ,貪盡挑射嘅時候已經偏離目標,白白錯失先開紀錄嘅機會。

105 分鐘互無紀錄,馬斯查蘭奴每每喺關鍵時刻出現截斷德國傳送,絕對功不可沒。德國同樣有舒韋恩史迪加同謝路美保定演出穩定,確保球隊不致被阿根廷反擊得手。加時下半場馬斯查蘭奴同碧利亞雙人飛鏟舒韋恩史迪加,可見呢道喺中場嘅血肉長城幾咁堅固。就連前鋒出身嘅阿古路都返後波,用手爪損「小豬」塊面搞到血流披面。

德國喺體能上嘅些微優勢,最終為佢哋帶嚟入球。加時下半場七分鐘,舒爾尼左路個人突破到三閘線傳中,葛斯小禁區邊心口腔定,車身窩利射破羅美路嘅十指關,為球迷帶嚟期待以久嘅入球。阿根廷喺所餘無幾嘅時間傾力反撲,美斯連頭槌都出埋,但始終過唔到紐亞嘅十指關。
PermaLink: https://articles.zkiz.com/?id=107959

Next Page

ZKIZ Archives @ 2019